विराटनगर । कोशी प्रदेशको सबैभन्दा ठूलो सरकारी अस्पताल कोशीमा दुई सिफ्टमा बहिरङ्ग (ओपिडी) संचालन सुरु भएको छ ।
स्वास्थ्य तथा जनसंङ्ख्या मन्त्रालयको परिपत्र आएपछि मंगलबारदेखि कोशी अस्पतालमा दुई सिफ्टमा ओपीडि सेवा संचालनमा ल्याएको हो ।
दुई सिफ्टमा ओपीडि सुरु भएपछि साढे ३ बजेसम्म चिकित्सक अनिवार्य बस्नुपर्ने नियम लागू भएको छ । यसअघि दुई बजेसम्म मात्र चिकित्सकले ओपीडिमा विरामी हर्ने गरेका थिए । जसले गर्दा ओपीडिमा आएका विरामीले ल्याब रिर्पोट देखाउने बेलामा चिकित्सक भेटिदैन थिए । रिपोर्ट देखाउन भोलीपल्ट आउनुपर्ने बाध्यता विरामीमा थियो । दोस्रो सिफ्ट पनि संचालन भएपछि विरामीले ओपीडि काटेको दिन रिर्पोट देखाउन पाउने भएका छन् ।
मन्त्रालयको परिपत्र आएपछि दुई सिफ्टमा ओपीडि सेवा सुरु भएको कोशी अस्पतालका मेसु डा. रविराज सिंहले बताए । ओपीडि टिकट काटनको लागि विहान ८ बजेदेखि दिउँसो १ बजेसम्म समय रहेको मेसु सिंहले बताए । ‘पहिलो सिफ्टमा ओपीडिमा विरामी जाँच्ने समय विहान ९ बजेदेखि दिउँसो १ बजेसम्म हुनेछ । दोस्रो सिफ्टमा ओपीडिमा विरामी जाँचने समय दिउँसो १ बजेदेखि साढे ३ बजेसम्म हुनेछ,’ मेसु सिंहले भने, ‘तेही अनुसार विभागीय प्रमुखहरुलाई जिम्मेवारी दिएर व्यवस्थापन पनि गरिएको छ ।’ कोशी अस्पतालमा एक दर्जन बढी विभाग रहेको छ । कुनै विभागमा एक जना मात्रै चिकित्सक रहेको छ । जसमा दुई सिफ्टमा ओपीडि संचालनमा समस्या हुने बुझिएको छ । कोशी अस्पतालको क्यान्सर र न्यूरो सर्जरी विभागमा एक जना मात्रै विशेषज्ञ चिकित्सक रहेका छन् । उक्त विभागमा दुई सिफ्टमा ओपीडि संचालन गर्न समस्या हुने चिकित्सकहरु बताउछन् । तर, मेसु भने थप जनशक्तिको माग गरेर भएपछि केन्द्रको परिपत्रलाई कार्यन्वयनमा लैजाने पक्षमा रहेका छन् । ‘जनशत्ति अभाव भएको ठाउँमा केन्द्रसँग जनशक्ति माग गर्नेछौं,’ मेसु सिंहले भने, ‘सचालनमा आएको दुई सिफ्ट ओपीडिलाई थप व्यवस्थित गरेर लैजान्छौं ।’