विराटनगर । मोरङको उर्लाबारी नगरपालिका ४ का २१ वर्षीय कुशल दाहालको हत्या आरोपमा प्रहरीले जनालाई पक्राउ गरेको छ । दाहालको हत्या आरोपमा मोरङ प्रहरीले उर्लाबारी– ५ का सुवास तामाङलाई बुधबार पक्राउ गरेको हो । पक्राउ परेका तामाङ कर्तब्य ज्यान मुद्दामा २०७६ सालको प्रजातन्त्र दिवसका दिन माफि पाएर छुटेका अभियुक्त हुन् ।

धरानतिर गइरहेका बेला उनलाई मोरङको बलियाबाट नियन्त्रणमा लिएको प्रहरीले जनाएको छ ।
पक्राउ परेका तामाङले मंगलवार राति साढे ६ बजेतिर आफ्नै घरमा बेलाएर उनको हत्या गरेको अनुसन्धानबाट खुलेको मोरङ प्रहरी प्रमुख एसपी नवराज कार्कीले बताए । मोबाइल चोरी गरेको आरोप लगाएर हत्या भएको प्रहरीको प्रारम्भिक अनुसन्धानले देखाएको उनले बताए । ‘मंगलवार साँझ साढे ६ बजेतिर आफ्नै घरमा आरोपी तामाङले बोलाएका रहेछन्,’ उनले भने‘दुई वटा स्कुटरमा कुशलसहित उनका साथी गएका रहेछन् । जाने बित्तिकै तैँले किन मेरो मोबाइल चोरीस भनेर कुटपिट गरेको प्रारम्भिक अनुसन्धानमा देखिन्छ । ’
तामाङ र दाहाल चिनजानकै भएको प्रहरीले जनाएको छ । उनिहरु बिच आउ जाउ भइरहने गरेको खुलेको छ । मोबाइल कुशलले चोरे नचोरेको भन्ने पुष्टि भई नसकेको एसपी कार्कीले बताए । एसपी कार्कीले थपे ‘प्रत्यक्ष दर्शीका अनुसार कुशलले पनि सरी दाइ म दिन्छु । गल्ती भयो भनेर भनेका रहेछन् ।’ उनीहरू लागु औषध प्रयोग कर्ता समेत भएको प्रहरीको अनुसन्धानले देखाएको छ ।
घरमा गएपछि पहिला घुँडा टेक्न लगाएको र यातना दिएको खुलेको मोरङ प्रहरीले जनाएको छ । ‘मेरो मोबाइल किन चोरीस भनेर पहिला सुवाले घुँडा टेकाएर लाठीले कुटेछन् । टाउको जिउ लगायत शारिका विभिन्न अङ्गमा हानेका रहेछन् । टाउकोबाट रगत बगेपछि कुशल भाग्न खोजेछन् । सुवास पनि मादक पदार्थ खाएर मातेका रहेछन् । त्यसपछि किचनबाट छुरा ल्याएर हानेछन’ उनले भने ।
मृतक कुशलको शरीरका विभिन्न भागमा छुराले हानेको चोटपटक रहेको प्रहरीले जनाएको छ । प्रहरीका अनुसार कुटपिट र छुरा प्रहार बाट गम्भीर घाइते भएका दाहाललाई उपचारका लागि केही युवाले गोदाबारी अस्पताल उर्लाबारीमा लगेको थिए । सामान्य उपचार पश्चात थप उपचारको लागि बी एन्ड सी अस्पताल बिर्तामोड झापा पठाइएकोमा उपचारको क्रममा बी एन्ड सी अस्पतालमा उपचारका क्रममा ज्यान गएको प्रहरीले जनाएको छ ।
आपराधिक पृष्ठभूमिका तामाङ घरमा एक्लै बस्दै आएको प्रहरीले जनाएको छ । तामाङ यसअघि पनि कर्तव्य ज्यान मुद्दामा तथा अन्य आपराधिक क्रियाकलापमा संलग्न भएपछि कारागार परेका थिए ।
उनलाई २०७१ असोज ९ गते कर्तव्य ज्यान मुद्दामा १० वर्षको कैद ठहर भएको थियो । २०७६ सालको प्रजातन्त्र दिवसका दिन उनी छुटेका थिए । लगतै ज्यान मार्ने उद्योगमा उनी पक्राउ परेका थिए । २०७७ भदौ ८ गते कैद भुक्तान गरी छुटेका थिए । उनी त्यसपछि लागु औषध प्रकरणमा पक्राउ परेका थिए । ब्राउन सुगर सहित पक्राउ परेका तामाङ २०७७ कार्तिक ७ गते १ लाख धरौटीमा छुटेका थिए ।
यस्तै अभद्र व्यवहार उनी माथि मुद्दा चलाइएको थियो । २०८० असोज २४ गते उनलाई एक लाख धरौटी माग गरिएको थियो । धरौटी तिर्न नसकेपछि कारागार चलान भएका थिए । भोलिपल्ट नै धरौटी तिरेर उनी छुटेका थिए ।
थप अनुसन्धानबाट अन्य कुरा खुल्ने मोरङ प्रहरीले जनाएको छ ।