विराटनगर । प्रतिबन्धित लागूऔषधसहित १७ जनालाई प्रहरीले नियन्त्रणमा लिएको छ । मोरङको बुढीगंगा गाउँपालिका – २ टंकिसिनवारीबाट चेकजाँचको क्रममा प्रतिबन्धित लागूऔषधसहित १७ जनलाई प्रहरीले आज दिउँसो पक्राउ गरेको हो ।

पक्राउ परेका मध्ये पाँच जनाको साथबाट प्रहरीले लागूऔषध बरामद गरेको मोरङ प्रहरीका प्रवक्ता डिएसपी रन्जन कुमार दाहालले जानकारी दिए । प्रहरीले उनीहरुको साथबाट ४ हजार थान भन्दा बढी ट्याबलेन्ट बरामद गरेको छ । प्रहरीले नियन्त्रणमा लिएका व्यक्तिको नाम पनि अहिले गोप्य राखेको छ । ‘नियन्त्रणमा लिएका व्यक्ति अहिले जिल्ला प्रहरी कार्यालयमा ल्याउने काम भइरहेको छ,’ डिएसपी दाहालले भने, ‘थप अनुसन्धानपछि पक्राउ परेका व्यक्ति र बरामद बस्तुको परिमाणबारेमा जानकारी दिनेछौं ।’

पक्राउ परेका पाँच जना बाहेक अन्य लागूऔषध प्रयोगकर्ता रहेको बुझिएको छ । उनीहरुले सीमावर्ती बजार जोगवनीमा लागूऔषध सेवन गरेर आएका थिए । केहीले सेवन पनि गरेर बोकेर आउने क्रममा प्रहरीले लागूऔषध बरामद गरेको हो ।