विराटनगर । विराटनगरस्थित कोशी अस्पतालभित्र भएको गैरकानुनी नियुक्ति प्रक्रिया र निरन्तर भएको बेथीति रोक्न माग राख्दै ज्ञापन पत्र बुझाएको छ ।

अस्पताल विकास समितिका अध्यक्ष र मेसुबाट भएको गैरकानुनी नियुक्ति र विकास निमार्णको कामहरू रोक्न माग राख्दै कोशी अस्पताल विकास समिति कर्मचारी यूनियनले मंगलबार ज्ञापन पत्र बुझाएका हुन् ।

कर्मचारी यूनियनका अध्यक्ष डा.रोशन खड्काले १७ बुद्धे मागसहितको ज्ञापन पत्र अस्पताल विकास समिति अध्यक्षका डा. फरवर्ड सिलवाल र मेसु डा. चन्द्रभाल झालाई भेटेर बुझाएका छन् । उनीहरूले कोशी अस्पताल विकास समितिले मनपरी मापदण्ड तयार पारी आफु निकटका व्यक्तिलाई राख्न गरिएको नियुक्ति प्रक्रिया तत्काल सच्याउनुपर्ने माग गरेका छन् । कोशी अस्पताल विकास समितिले चिकित्सक, स्वास्थ्यकर्मी र प्राविधिक गरी ५० जना कर्मचारी नियुक्तिका लागि आह्वान गरेको सूचना मापदण्ड विपरित रहेको भन्दै यसलाई सच्याउनु पर्ने माग गरिएको हो ।
तीन महिनाको सेवा करार रहने गरी ४ माघमा जारी गरेको सूचनाले अस्पतालमा कार्यरतहरुको मनोबल गिराएको आरोप लगाइएको छ ।
नियमित कार्यरत करार र ज्यालादारीका चिकित्सक तथा अन्य प्राविधिक कर्मचारीहरुलाई वेवास्ता गरी सूचना प्रकाशित गरिएकोमा ध्यानाकर्षण गराइएको छ । यस अघि कार्यरत ज्यालादारीका चिकित्सक तथा अन्य प्राविधिक कर्मचारीहरुलाई उक्त प्रकाशित सूचनाले समेट्न नसक्ने बताउँदै कार्यरतहरुको व्यवस्थापनमा पहल लिन आग्रह गरिएको छ । अस्पतालवाट प्रकाशित कर्मचारी छनौट सम्बन्धि सूचनामा एकरुपता नदेखिएको बताउँदै एउटै सूचनामा प्रकाशित पदहरु लिखित र अन्तबार्ताबाट पदपूर्ति गर्ने भनिएको र केहि पदहरुका लागि अन्तवार्ता मात्र गर्ने भनिएकोले असमानतालाई संसोधन गर्न माग गरिएको छ ।

यसैगरी दरवन्दी बिना जथाभावी कर्मचारी नियुक्ति गर्ने परिपाटिको रोक्न र सेवा सञ्चालनमा ध्यान दिन आग्रह गरिएको छ । कर्मचारीहरुका विचमा विभेद र विभाजन गर्ने काम भईरहेको भन्दै त्यसमा ध्यानाकर्षण गराइएको छ ।
उनीहरुले बन्द भएको एनआइसियू सेवा पूर्ण रुपमा तत्काल संचालन गर्न पनि माग गरिएको छ । एक वर्ष अगाडीदेखि अस्पतालको एनआइसियू सेवा बन्द हुँदा कोशीमा आएका विरामी निजी हस्पिटलमा उपचार गर्न बाध्य छन् । यसैगरी अस्पतालमा कार्यरत सम्पूर्ण कर्मचारीहरुको स्वास्थ्य विमा गरिनुपर्ने, अस्पताल विकास समितिको बैठकमा कर्मचारी युनियनको अध्यक्षलाई समावेश गराउनुपर्ने, कुनैपनि कर्मचारी नियुक्ति गर्दा विभागिय प्रमुखसँग अनिवार्य रुपमा सल्लाह गरिनुपर्ने माग गरिएको छ । अस्पताल विकास समितिले अहिले थप तीन जना मेडिकल अधिकृत नियुक्ति गर्न सूचना आव्हना गरिएको छ । तर, विभागीय प्रमुखसँग कुनै सरसल्लाह नगरी सूचना आव्हान भएको भन्दै उनीहरु असन्तुष्ट रहेका छन् ।यूनियनले कोशी अस्पताल विकास समिति, जिल्ला प्रशासन कार्यालय मोरङ, स्वास्थ्य तथा जनसंख्या मन्त्रालयलाई बोदार्थ दिएको छ ।