विराटनगर । विराटनगरस्थित मेट्रो न्यूरो ट्रमा एण्ड मल्टिस्पेशलिटी हस्पिटल प्रा. लि. द्वारा संचालित मकालु एभरेष्ट हस्पिटलमा मस्तिष्कमा पानी जमेको एक जना विरामीको सफल उपचार भएको छ ।

भारतको फारवीजगन्ज घर भएका ७५ वर्षीय प्रदिप मिश्राको मकालु एभरेष्ट हस्पिटलमा सफल उपचार भएको हो ।
मस्तिष्कमा पानी जमेको कारण मिश्रा लामो समयदेखि थला परेर बसेका थिए । उनको पिसाब चुहिने, हिडडुल गर्न नसक्ने र बोलेको कुराहरु बिर्सने समस्याले पीडित थिए । उनी विराटनगरको थुप्रै अस्पताल पुगे । उपचारमा संलग्न फिजिसियन चिकित्सक डा. दीपक सिग्देलले न्यूरो सर्जन डा. चन्द्रप्रकाश यादवसँग थप उपचारको लागि पढाइदिए । त्यसपछि डा. यादवले मकालु एभरेष्ट हस्पिटलमा मिश्राको मस्तिष्कमा अत्याधिक धेरै जमेको पानी शुक्रबार ‘भीपी’ सर्जरी गरेर सफल उपचार गरेका छन् ।

‘विरामीको मस्तिष्कमा धेरै पानी जमेको थियो । मेडिकल भाषामा यसलाई एनपीएच अर्थात नर्मल प्रेसर हाइडोसिफलक्स भनिन्छ । यसको समस्याले गर्दा विरामीलाई हिडडुल गर्न समस्या हुन्छ । विरामी हस्पिटल आएपछि हामीले टाउँको सानो दूलो बनाएर शल्यक्रिया गरिएको हो,’ उपचारमा संलग्न चिकित्सक यादवले भने, ‘उपचार सफल भएपछि विरामी अहिले डिस्चार्ज हुनुभएको छ ।’ ब्रेनमा इन्फेक्सनको कारणले पनि विरामीलाई यस्तो समस्या देखा पर्ने उनले बताए ।

गत बिहीबार अस्पताल भर्ना भएका मिश्रको शुक्रबार डा. यादवसहितको टिमले शल्यक्रिया गरेको थियो । त्यसपछि मंगलबार मिश्रको डिस्चार्ज भएको छ । डिस्चार्ज पछि विरामीको भान्जी गीता शर्मा अधिकारीले मामाको सफल उपचार भएपछि खुसी व्यक्त गरिन् । ‘मामा विरामी भएपछि थला पर्नु भएको थियो । बोलेको कुरा भुल्ने गर्नुहुन्थ्यो । उपचारपछि अहिले मज्जासँग हिडडुल गर्न सक्ने हुनुभएको छ । उपचारमा संलग्न चिकित्कसप्रति आभारी छु,’ मामाको डिस्चार्जपछि उनले भनिन् ।