विराटनगर । मोरङको रंगेलीमा भक्का दिवस मनाइएको छ । नगरपालिकाको आयोजनामा ७ औँ राष्ट्रिय भक्का दिवस मनाइएको हो । नगर परिसरमा आयोजित कार्यक्रममा भक्काको व्यापार गरेर जिविकोपार्जन गर्ने उद्यमी महिलाहरुलाई नगरपालिकाले सम्मान गरेको छ ।

दिवसको अवसरमा आयोजित कार्यक्रममा महिलाहरुले गर्दै आएको श्रम र मेहनतको उच्च सम्मान गर्दै मेयर दिलिप बगडीया र उपमेयर भूमा पराजुलीले उनीहरुलाई मयाको चिनो वितरण गरे । नगरपालिकाले आफुहरुले गर्दै आएको कामको उच्च सम्मान गरेको भन्दै महिलाहरु खुशि भएका थिए ।

सो अवसरमा बोल्दै मेयर बगडीयाले महिलाहरुले गर्दै आएको कामको उच्च कदर गर्दै गत वर्ष विभिन्न सामाग्री नगरपालिकाबाट वितरण गरिएको बताए ।

उनले विगतमा भक्का व्यवसाय बढाएर राम्रो आयआर्जन गर्नका लागि महिलाहरुलाई आवश्यक सामाग्री वितरण गरिएको जानकारी दिए । मेयर बगडीयाले सफा एवम् व्यवस्थित रुपले भक्का व्यवसाय गर्नका लागि थप सहयोग गर्ने प्रतिवद्धता समेत जनाए ।

उनले महिलाहरु चुल्हाचौकामा मात्र सिमित नभएर आत्मनिर्भर बन्नुपर्ने र त्यसमा नगरपालिकाले सक्ने सहयोग गर्ने बताए ।

कार्यक्रममा उपमेयर पराजुलीले यसपटक नगरपालिकाकै आयोजनामा भक्का दिवस मनाउन सुरुवात गरिएको बताइन् । गतवर्ष रंगेली नगरपालिकाभित्रका भक्का व्यापार गरेर जिविकोपार्जन गर्ने महिलाहरुलाई उद्यमी बनाएर आयआर्जनका लागि १२५ जनालाई आवश्यक सामाग्रीहरु वितरण गरेको थियो ।

महिलाहरुले सञ्चालन गर्दै आएको भक्का व्यवायलाई प्रोत्साहन गर्न गत वर्ष सामाग्री वितरण गरिएको र यसपटक सोही सामाग्रीबाट महिलाहरुले राम्रो व्यवसाय सञ्चालन गरि स्वरोजगार बनेकाले सम्मान गरिएको उपमेयर पराजुलीले बताइन् ।

उनले महिलाहरुलाई आर्थिकरुपमा निर्भर बनाउन नगरपालिकाले आवश्यक सहयोग गरिरहने समेत बताइन् । 

सो अवसरमा नगर परिसरभित्रै भक्का व्यवसायी महिलाहरुले भक्का बनाएर सवैलाई ख्वाएका थिए । सो अवसरमा नगर कार्यपालिका सदस्यहरु, ९ वटै वडाका जनप्रतिनिधिहरु, स्थानीय समाजसेवी, वुद्धिजिविलगायतको पनि सहभागीता रहेको थियो ।