विराटनगर । पानी र हावाको मिश्रणको चापबाट चल्ने ‘वाटर रकेट’ तयार हुँदा विराटनगरस्थित शिक्षादीप कलेजका ७ जना विद्यार्थीको अनुहारमा बेग्लै चमक देखियो । कक्षा १२ मा विज्ञान संकाय लिएर अध्ययन गर्दै आएका आयुष ठाकुर, रितेस भट्टराई, राहुल ठाकुर, प्रशान्त झा, सिमृका तिमल्सिना, संस्कृति कर्ण र सिवाङ्का भगतले लामोसमयसम्मको खोज र अनुसन्धानपछि वाटर रकेट तयार पारे । उनीहरूले लामो समयसम्मको मेहनत बुधबारदेखि सुरू भएको विज्ञान सम्बन्धी ६ दिने कार्यशालामा वाटर रकेट देखाउँदा सहभागि भएका जनप्रतिनिधी, प्रध्यापक, शिक्षक र विद्यार्थीहरू पनि दंग देखिन्थे ।

उनीहरुले ५० मिटर उचाइसम्म उडने वाटर रकेट बनाएको विद्यार्थी आयुष ठाकुरले बताए । वाटर रकेट प्रक्षेपणपछि उनले भने, ‘विज्ञान पढेको स्वाद त बल्ल पो आयो ।’ कार्यशालाले विज्ञान क्षेत्रमा नेपालले केही गर्न सक्ने सम्भावना देखाएको उनले सुनाए ।
शिक्षादीप कलेजले विज्ञान संकाय अध्ययरत विद्यार्थीहरुका लागि अन्तरिक्ष विज्ञानसम्बन्धी ६ दिने कार्यशाला बुधबारदेखि सुरु गरेको छ । रिसिक इनोभेसन्स अन्तर्गतको ‘द स्क्वाड अफ चेन्ज मेकर्स’ सँगको सहकार्यमा विज्ञान संकाय अध्ययनरत विद्यार्थीहरुका लागि कार्यशाला सुरु गरेको हो ।

विज्ञान बिषय अध्ययनरत ४ समुुहमा विभाजन गरेर कार्यशालामा सहभागी गराईएको कलेजका प्रिन्सिपल ज्ञानबहादुर खड्काले जानकारी दिए । कार्यशाला सकिएपछि विद्यार्थीहरुले पाँच हजार फिट उड्ने रकेट बनाउने द स्कुवाड अफ चेन्ज मेकर्सका अध्यक्ष सुशील देव भट्टराईले बताए । फियुलमा सुगर प्रयोग गरेर बनाउने रकेट प्रतिसेकेण्ड ७० फिट स्पीटको प्रक्षेपण गरिएको उनले बताए । विद्यार्थीहरुले कार्यशालमा रोबोटिक्स, खगोल विज्ञान, रकेट साईन्स, स्याटेलाईट टेक्नोलोजी, उडड्यन प्रविधिसँग सम्बन्धित सैद्धान्तिक र प्रयोगात्मक ज्ञान आर्जन गर्नेछन् । पौष २ गतेसम्म चल्ने कार्यशालमा विद्यार्थीहरुलाई ६ दिनसम्म क्रमशः पहिलो दिन सैद्धान्तिक र दोश्रो दिन प्रयोगात्मक कक्षामा सहभागी गराउने तयारी कलेजले गरेको छ । कार्यशालामा विद्यार्थीहरुले ११० मिलिमिटरको अमेच्योर रकेट, १ यूनिटको क्युब स्याटेलाईट र ३ किलोमिटर रेन्ज भएको रिमोट कन्ट्रोल प्लेन बनाउन सिक्नेछन् । खगोलशास्त्रको अन्तिम दुईदिने कार्यशालामा विद्यार्थीहरुलाई छुद्र ग्रह पत्ता लगाउन तथा आकाशको म्यापिङ गर्न समेत सिकाईने बताईएको छ ।

‘विद्यार्थीले किताबी ज्ञान र आउट नलेज व्यवहार्रमा उतारेका छन् । वाटर रकेट बनाएर उडाउँदा छुट्टै आनन्द हुँदो रहेछ,’ कलेजका प्रिन्सिपल ज्ञानबहादुर खड्काले भने, ‘अब यस्ता गतिविधि निरन्तर गरेर विज्ञान सिकाइ प्रभावकारी बनाउनु आवश्यक छ ।’ कार्यशालाले विद्यार्थीलाई नयाँ ढंगले सोच्न सहयोग पुग्ने उनले बताए । कार्यशालाले विद्यार्थीको सीप अभिवृद्धि गरी आत्मविश्वास जगाएको उनले बताए ।
कार्यशालाको उद्घाटन गर्दै विराटनगर महानगरपालिकाका मेयर नागेश कोईरालाले विद्यार्थीहरुले आफुसँग भएको अवसरलाई सदुपयोग गर्न सिक्नुपर्ने बताए । कार्यक्रममा पूर्वाञ्चल विश्व विद्यालयका उपकुलपति प्राडा यादवराज कोइराला, कलेजका अध्यक्ष तथा प्रदेश सांसद भिम पराजुलीलगायले विद्यार्थीहरुले सिकेको कितावी ज्ञान व्यवहारमा उतार्नुपर्नेमा जोड दिए ।
मोरङमै पहिलोपटक आयोजना गरिएको यसप्रकृतिको कार्यशालाका लागि ९ जना विज्ञको टोली विराटनगर आएका छन् । विश्वबजारमा प्रतिस्पर्धा गर्नसक्ने दक्ष जनशक्ति उत्पादनमा समेत कार्यशालाले महत्वपूर्ण भुमिका खेल्ने बताईएको छ ।