विराटनगर । नेपाल औषधी व्यवसायी संघ मोरङका उपाध्यक्ष देशबन्धु ढकालले छठ पूजाका क्रममा सडकमा दण्ड प्रणाम गर्दै यात्रा गरेका छन् । मुलुकको शान्ति विकास र समबृद्धिको कामना गर्दै दण्ड प्रणाम यात्रा गरेको उनले बताए ।

दण्ड प्रणाम यात्राका लागि उनी शनिबारदेखि व्रत बसेका थिए । उनी वर्षौदेखि छठी माताको उपासना बस्ने गरेका छन् । प्रत्येक वर्ष छठमा ब्रत लिने गरेका छन् । यो उनको पहिलो पटक दण्ड प्रणाम यात्रा हो ।

विराटनगर ९ मा रहेको घरबाट पूजा गर्दै उनले मधुमारास्थित बनाएको पोखरीमा राखिएको पूजा स्थलसम्म दण्ड प्रणाम गरेर आज अस्ताउँदो सूर्यलाई अर्घ्य दिएका छन् । अस्ताउँदो सूर्यलाई अर्घ्य दिँदा व्रतालुले दुवै हातमा चालमको घोल र सिन्दूर लगाएर अक्षता र फुलसहित पालैपालो अर्घ्य सामग्री सूर्य देवता समक्ष अर्पण गरिएको छ।

३६ घण्टासम्म पानीसमेत नखाई व्रत बसिने यो पर्वमा अस्ताउँदो र उदाउँदो सूर्य देवतालाई अर्घ्य दिँदै छठीमाताको पूजा आराधना गर्ने गरिन्छ । भोलि बिहान उदाउँदो सूर्यलाई अर्घ चढाएपछि छठ विधिवत् रूपमा समापन हुन्छ ।