विराटनगर । प्याब्सन हिज्जे प्रतियोगिताको उपाधि मोरङको उर्लाबारीस्थित सप्तकोशी सेकेण्डरी स्कुलले जितेको छ ।
प्याब्सन मोरङले विराटनगरमा बुधबार आयोजना गरेको प्रतियोगितमा सप्तकोशीले फाइनलमा ९ वटा स्कूललाई पछि पार्दै उपाधि जितेको हो ।

जितसँगै सप्तकोशीले नगद १५ हजार रुपैयाँको साथै आकर्षण ट्रफि हात पारेको छ । साविक विजेता विराटनगरको मदरल्याण्ड एकाडेमी फस्ट रनरअप भएको छ । मदरल्याण्ड एकोडेमीले नगद १० हजार रुपैयाँ पाएको छ ।
प्रतियोगिताको सेकेण्ड रनरअफ सुन्दहरैचाको सुविजिमुर मेमोरियल स्कुलले जितेको छ । सुविजिमुरले नगद ५ हजार रुपैयाँ पायो ।
प्रतियोगितामा मोरङ जिल्लाको प्याब्सनमा आवद्ध ४० वटा स्कुलहरु सहभागि रहेको मोरङ अध्यक्ष प्रेमसिंह सुवालले जानकारी दिए ।
विजेतालाई प्याब्सनका केन्द्रीय उपाध्यक्ष राजेश दास, केन्द्रीय प्राज्ञिक परिषदका सदस्य रमेश मिश्रा, प्याब्सन कोशी प्रदेशका उपाध्यक्ष अर्जुन बस्नेत, प्याब्सन मोरङ अध्यक्ष प्रेमसिंश सुवाल प्याब्सन मोरङका वरिष्ठ सल्लाहाकार सावित्रा पराजुलीलगायतले पुरस्कार तथा ट्रफि वितरण गरे ।

कार्यक्रमको प्रमुख अतिथि विराटनगर महानगरपालिकाका मेयर नागेश कोइरालाले विद्यालयस्तरदेखि नै व्यवहारिक र सीपमूलक शिक्षा नदिएकै कारण बेरोजगारी समस्या बढ्दै गएको बताए । मेयर कोइरालाले सैद्धान्तिक र व्यवहारिक शिक्षालाई सँगसँगै अगाडि बढाएमात्रै उत्पादित जनशक्तिले रोजगारी प्राप्त गर्ने दाबी गर्नुभयो । उहाँले चारवटा विषयमा डिग्री हासिल गरे पनि सीप छैन भने रोजगारी पाउने अवस्था नरहेको प्रस्ट पारे । घोकन्ते शिक्षाभन्दा व्यवहारिक शिक्षामा जोड दिनुपर्नेको आग्रह थियो । विद्यालय तहदेखि नै व्यवहारिक शिक्षामा जोड दिएमा उत्पादित जनशक्ति देश–विदेशको श्रमबजारमा बिक्न सक्ने मेयरको भनाइ थियो । हरेक वर्ष नेपाली श्रमबजारमा ५ लाखभन्दा बढी जनशक्ति आउने गरेको बताउँदै त्यसमध्ये थोरैले मात्रै स्वदेशमा रोजगारी पाउने गरेको उनले बताए ।