विराटनगर । महानगरको कामकारबाहीको आलोचना गर्दै विराटनगर महानगरपालिका अगाडि ब्यानर बोकेर उभिने एक महिलालाइ प्रहरीले पक्राउ गरेको छ ।

सामुदायिक विद्यालय शिक्षा सुधारको माग गर्दै महानगरपालिका अगाडि दैनिक धर्ना बस्दै आएकी ५२ वर्षीयाँ इन्दिरा चापागाईंलार्ई प्रहरीले पक्राउ गरी अर्भद्र व्यवहारको मुद्दामा म्याद थप गरी अनुसन्धान सुरु गरेको हो ।

विराटनगरका मेयर नागेश कोइरालालाई अभद्र व्यवहार गरेको भन्दै विराटनगर महानगरपालिकाले जिल्ला प्रशासन कार्यालय मोरङमा उजुरी दिएको थियो । महानगरको मेयरबाट उजुरी आएपछि विराटनगर ५ निवासी चापागाईंलाई पक्राउ गरी अभद्र व्यवहार मुद्दामा म्याद थप गरिएको छ ।

विराटनगर बरगाछीमा रहेको गोग्राहा माध्यमिक विद्यालयको सञ्चालक समितिको पूर्वअध्यक्ष रहेकी चापागाईं विद्यालय सुधारका लागि भन्दै विराटनगर महानगरपालिकाको कार्यालय अगाडि धर्ना बस्ने गरेकी थिइन् । गत जेठदेखि महानगर गेटमा एक्लै विरोध जनाइरहेकी उनलाई मेयर नागेश कोइरालाको निर्देशनमा प्रहरीमा उजुरी दिएर पक्राउ गरिएको हो ।

महानगरले निजी स्रोतबाट सञ्चालन भएको गोग्राहा कलेजलाई ५ लाख रुपैयाँ बजेट निकासा गरेको भन्दै चापागाईंले विरोध गर्दै आएकी छन् । उनले सो रकम फिर्ता गरी स्कूलबाट कलेज हटाउन माग गरेकी छन् ।

गोग्राह स्कुलको संरचनामा पूर्वाञ्चल विश्वविद्यालयबाट अनुमति लिएर गोग्राहा कलेज सञ्चालित छ । सुरुमा कलेज विद्यालय मातहत नै रहेकोमा पछिल्लो समय भने छुट्टै बनाइएको छ । कलेजले शिक्षा संकायतर्फ बिएडको कक्षा सञ्चालन गर्दै आएको छ ।

टाउकोमा रातो फोटा, हातमा राष्ट्रिय झण्डा र ब्यानरमा आफ्ना माग राखेर एक्लै आन्दोलनमा उत्रिएकी चापागाईंले यसअघि सुशासनका लागि प्रदेशसभा सचिवालय र प्रदेशका मन्त्रालयमा पनि एक्लै धर्ना दिएकी थिइन् । निरन्तर एक्लै आन्दोलनमा होमिएकी उनलाई ‘मनोरोगी’ को आरोप पनि लाग्ने गरेको छ।

महानगरको उजुरीको आधारमा चापागाईंलाई पक्राउ गरि मुद्दा चलाएको जिल्ला प्रहरी कार्यालय मोरङका डीएसपी छेदीलाल कामतीले जानकारी दिए । विराटनगर महानगरपालिका प्रमुख प्रशासकीय अधिकृत राजेन्द्र पराजुलीले मेयर कोइरालामाथि अभद्र रुपमा प्रस्तुत भएकाले उनको विरुद्ध जिल्ला प्रशासन कायालयमा निवेदन दिएको बताए । मोरङका प्रमुख जिल्ला अधिकारी वीरेन्द्र यादवले महिलालाई आफूले चिनेपनि पक्राउ परेको र मुद्दा दर्ताबारे जानकारी नभएको बताएका छन् ।

चापागाईंसँग महानगरमा आफूले छलफल गरेको भएपनि उनी अभद्र रुपमा प्रस्तुत हुने गरेको पराजुलीको आरोप छ । जायज माग राखेर विकृतिविरुद्ध शान्तपूर्ण धर्ना बस्ने र उजुरी गर्ने मौलिक अधिकार भए पनि आफूलाई महानगरले झुटो आरोपमा पक्राउ गर्न लगाएर मुद्दा दर्ता गराएको चापागाईंले बताएकी छन् । पटक–पटक नगर प्रहरी र नेपाल प्रहरीले धर्नास्थलबाट हटाउन आफूमाथि कुटपिट गरेको उनको गुनासो छ ।