विराटनगर । सातौं दक्षिण एसियाली आइटिएफ तेक्वान्दो च्याम्पियनसिप खेल्न नेपाली टोली भारत प्रस्थान गरेका छन् । आगामी अगस्ट ४ देखि ६ तारिखसम्म भारतको हैदराबादमा हुने च्याम्पियनसिपमा नेपालका ५१ खेलाडीले प्रतिस्पर्धा गर्ने भएका हुन् । त्यसका लागि ५१ जना खेलाडीसहित २० जना अम्पायर र अफिसियल गररी ७१ सदस्यीय नेपाली टोली मंगलबार भारतको हैदराबाद प्रस्थान गरेको छ ।

प्रस्थान गरेका मध्ये १० जना खेलाडी र तीन जना अम्पायर कोशी प्रदेशका रहेका छन् । कोशी प्रदेशबाट खेल्ने जाने १० खेलाडी मध्ये ४ जना महिला र ६ जना पुरुष खेलाडीहरु रहेका छन् । उनीहरुलाई विराटनगर महानगरपालिकाकी उपप्रमुख शिल्पा निरला कार्कीले एक कार्यक्रमबीच बिदाइ गरेकी थिइन् ।

विदाई कार्यक्रममा बोल्दै उपप्रमुख कार्कीले मार्सल आर्ट गेम्सका खेलाडीहरुले अन्तर्राष्ट्रिय प्रतियोगितामा थुप्रै मेडेलहरु हात पारी नेपालको नाम उच्च राख्न सफल भएको बताइन् । उनले यस प्रतियोगितामा पनि नेपालले मेडल प्राप्त गरी इतिहास रच्ने विश्वास दिलाउँदै खेलाडीहरुलाई जितको सफलताको शुभकामना दिइन् ।

यसरी कोशीबाट प्रस्थान गर्नेहरूमा संजीना मगर, विर बहादुर तामाङ्ग, आलोक राई, रोशन मगर, नितेश खवास, केरीसा आचार्य, सविना मगर, सोमबहादुर राजवंशी, श्याम प्रसाद सापकोटा र कुसुम राजवंशी रहेको नेपाल आईटिएफका अध्यक्ष प्रविण कुमार कार्कीले जानकारी दिए । अम्पायरहरुमा प्रविण कुमार कार्की, राजेन्द्र धिमाल र चन्द्रकुमार तामाङ्ग रहेका छन् ।
प्रयिोगितामा नेपाल, भारत , बङ्ग्लादेश, भुटान, श्रीलङका, माल्दिप्स आदी देशहरुका खेलाडीहरुले सहभागिता जनाउनेछन् ।