विराटनगर । विराटनगर – ३ मा रहेको पोखरीया माध्यमिक विद्यालयमा कक्षा ११ मा भर्ना हुनको लागि प्रवेश परीक्षा लिएको छ । कक्षा ११ मा विज्ञान, व्यवस्थापन, शिक्षा र कम्प्युटर इन्जिनियरिङ अध्ययन गर्नको लागि पोखरीयाले विद्याथीहरुको मंगलबार प्रवेश परीक्षा लिएको हो ।
६९७ जना विद्यार्थीले पोखरीयामा भर्नाको लागि प्रवेश परीक्षा दिएको पोखरीया स्कुलका प्रिन्सिपल खेमराज भट्टराईले जानकारी दिए ।

विज्ञान संकयामा २३५ , व्यवस्थापनमा ३७८, शिक्षामा ३६ जना, कम्प्युटर इन्जिनियरिङ्गमा ४८ जना विद्यार्थीले प्रवेश परीक्षा दिएको उनले बताए । विज्ञान र व्यवस्थापन संकायमा एक सय जना विद्यार्थीको कोटा रहेको छ । बुधबार प्रवेश परीक्षाको नतिजा सार्वजानिक हुने उनले बताए ।
विद्यार्थीको चाप बढेपछि विद्यालयले नयाँ भर्ना हुने विद्यार्थी संख्याको सीमा तोकेर प्रवेश परीक्षा लिन थालेका छन् । सक्षम नेतृत्व, कुशल व्यवस्थापन र मेहनती शिक्षक शिक्षिकाहरुका कारण यो विद्यालयमा छोराछोरी पढाउने धेरै अभिभावक लालायित हुने गरेका छन् ।

‘यहाँ पढ्न चाहनेजति सबैलाई भर्ना गर्न सक्ने स्थिति नै हुँदैन, विद्यार्थीको चापका कारण प्रवेश परीक्षा लिएर त्यसको रिजल्टका आधारमा मात्रै भर्ना लिन थालेका हौंं,’ प्रअ भट्टराईले भने, ‘प्रवेश परीक्षा उत्तीर्ण गर्न नसक्नेलाई जो कसैले भनसुन गरे पनि भर्ना लिन्नौं ।’

अंग्रेजी माध्यमबाट पढाइ गर्दै उत्कृष्ट नतिजा दिँदै आएको यो विद्यालयले भर्ना लिन कक्षा ६ देखि ९ सम्म पनि विद्यार्थीको भिड लाग्ने गरेको छ ।