विराटनगर, २० असार । सुनवर्षी–१ स्थित केचना सहकारी संस्थाले सञ्चालन गरेको दुध चिस्यान उपकरण हस्तान्तरण गरिएको छ ।

सुनवर्षी नगरपालिकाका मेयर श्यामप्रसाद राजवंशीले ३ हजार लिटर क्षमता भएको दुध चिस्यान उपकरण हस्तान्तरण गरेका हुन् । मेयर राजवंशीले एक कार्यक्रमकाबिच बुधबार केचना डेरीमै पुगेर उक्त उपकरण हस्तान्तरण गरे । 

सो अवसरमा बोल्दै मेयर राजवंशीले सुनवर्षी नगरपालिकाको चौतर्फी विकासका लागि नगरपालिका लागि परेको बताए । उनले कृषकको समृद्धि र विकासले मात्र सिंगो नगरको विकास सम्भव हुने बताए । 

मेयर राजवंशीले सो डेरी मार्फत स्थानीय कृषकको समृद्धि र विकासका लागि शुभकामना व्यक्त गरे । सो चिस्यान उपकरण सुनवर्षी नगरपालिकाको लागनीमा स्थानीय कृषकहरुको सहजताका लागि हस्तान्तरण गरिएको हो । 

हस्तान्तरण कार्यक्रममा सुनवर्षी नगरपालिकाका प्रमुख प्रशासकिय अधिकृत रुद्रप्रसाद दुलालको पनि उपस्थिती रहेको थियो । 

सुनवर्षी नगरपालिकाले कृषि क्षेत्रलाई विशेष प्रथामिकतामा राख्दै आएको छ । मेयर राजवंशीले निर्वाचित भएर आउँदा पहिलो निर्णयनै कृषकले सिँचाईका लागि तिर्ने विद्युत महशुल निःशुल्क गर्ने निर्णय गरेका थिए ।