विराटनगर । विराटनगरस्थित कोशी अस्पतालमा नयाँ मेसु नियुक्ति भएका छन् । कोशीका निमिक्त मेसु डाक्टर रविराज सिंह चार महिनामै परिवर्तन भएका हुन् । उनका ठाउँमा कोशी अस्पतालका छाला तथा यौनरोग विशेषज्ञ डाक्टर चन्द्रभाल झालाई नियुक्त गरिएको हो । झा चार महिना अगडाी ११ औं तहमा बढुवा भएका चिकित्सक हुन् । उनी कोशी अस्पतालमा विगत चार वर्षदेखि कार्यरत छन् ।

कोशी अगाडी मेची अस्पतालमा थिए । समायोजन भएपछि झाले कोशी अस्पताल रोजेपछी उनी २०७६ सालदेखि कार्यरत रहेका छन् ।

सिंहले गत फागुन २ गते कोशीको निमिक्त मेसु भएर कार्यभार सम्हाल्दै आएका थिए । झा मेसुमा नियुक्ति भएसँगै सिंह पुरानै जिम्मेवारीमा फर्किएका छन् ।

संघीय सरकारमा स्वास्थ्य तथा जनसंख्या मन्त्री फेरीएसँगै अस्पतालको मेडिकल सुपरिटेन्डेन्ट परिवर्तन हुने कोशीको पुरानै रोग रहेको छ । स्वास्थ्य मन्त्री परिवर्तन भएपिच्छे मेसु र अस्पताल विकास समिति परिवर्तन हुने गरेको हो ।

नेकपा माओवादी केन्द्रका अध्यक्ष पुष्पकलम दाहाल प्रचण्डको नेतृत्वमा बनेको सरकारमा काँग्रेसबाट मोहनबहादुर बस्नेत स्वास्थ्य तथा जनसंख्या मन्त्रीमा बहाल छन् । स्वास्थ्यमन्त्रीमा बहाल भएपछि मन्त्री बस्नेतले स्थानीय नेताहरूको दबाबमा अस्पतालका सर्जन डा. सिंहलाई चार महिनामै हटाएर नयाँ मेसिमा झालाई नियुक्त गरेका हुन् । आइतबार मन्त्री स्तरीय निर्णायले झालाई मेसुमा नियुक्त गरेको हो । उनले मंगलबार कार्यभार सम्हाल्ने तयारी गरेका छन् ।

कोशी अस्पतालमा मेसुको ११ औं तहको दरबन्दी छ । मेसुमा नियुक्ति भएका झा ११ औं तहकै चिकित्सक हुन् । कोशीमा ११ औं तहका डा. दीपक सिग्देल र बाल रोग विशेषज्ञ डा. रामनारायण चौधरी मात्र रहेका छन् ।

यसरी स्वास्थ्य तथा जनसंख्या मन्त्रालयमा मन्त्री परिवर्तन भएसँगै छोटो अवधीमा मेसु परिवर्तन हुँदा हस्पिटलको काम कारवाहीमा समस्या हुने गरेको हस्पिटलका कर्मचारी बताउँछन् ।

१६ महिनामा तीन जना मेसु फेरीए
कोशीमा पछिल्लो १६ महिनामा तीन जना मेसु परिवर्तन भएका छन् । २०७८ फागुन ५ गते स्वास्थ्य मन्त्रीमा विरोध खतिवडा आएसँगै हाडजोर्नी तथा नशारोग विशेषज्ञ डाक्टर यज्ञदराज खरेल मेसुमा नियुक्त भए ।

खरेलले ६ महिना काम गर्दा नगर्दा खतिवडाको पद धरापमा प¥यो । खतिवडाको ठाउँमा स्वास्थ्य मन्त्रीमा भवानी खापुङ नियुक्त भए । उनै खापुङले डाक्टर लक्ष्मीनारायण यादवलाई निमित्त मेसुको जिम्मेवारी दिएका थिए । त्यसपछि खरेल २०७९ भदौ १५ गतेदेखि अस्पतालको पुरानै जिम्मेवारीमा फर्किए ।

२०७९ भदौ १६ गते डाक्टर यादवले मेडिकल सुपरिटेन्डेन्टको जिम्मेवारी पाएका थिए । यादवले जिम्मेवारी पाएको छ महिना नबित्दै स्वास्थ्य तथा जनसंख्या मन्त्री पदम गिरीले एमालेका स्थानीय नेताको दबावले उनको जिम्मेवारी खोस्यो । मन्त्रालयले २०७९ फागुन २ निमित्त मेसुको जिम्मेवारी डाक्टर रविनराज सिंहलाई दिएको थियो । सिंहले जिम्मेवारी सम्हालेको ४ महिनापछि नयाँ मेसुमा चन्द्रभाल झा आएका छन् । कोसी अस्पतालमा हालसम्ममा ३३ जना मेसु परिवर्तन भएका छन् । अस्पतालको रेकर्ड अनुसार कार्यालय प्रमुखको रूपमा २०१८ साल पुसमा डाक्टर भरतराज वैद्य नियुक्त भएका थिए । उनले झन्डै १० वर्ष अस्पताल प्रमुखको रूपमा काम गरेको रेकर्ड छ । पछिल्लो समय भने अस्पतालमा हुने राजनीतिकरण र अदृश्य ढङ्गले हुने चलखेलका कारण अस्पताल प्रमुख १ वर्ष टिक्न पनि मुस्किल देखिएको छ । अस्पताल प्रशासनका अनुसार पछिल्लो पटक डाक्टर चुमनलाल दासले मात्रै एक वर्ष काम गर्न पाएका थिए । २०७७ असार १ गते मेसुको जिम्मेवारी पाएका दास २०७८ फागुन ४ गतेसम्म जिम्मेवारीमा थिए ।
साढे ३ सय शय्याको कोशी अस्पतालमा दैनिक ओपीडिमा १ हजार देखि १ हजार पाँच सय विरामीले स्वास्थ्य उपचार गर्ने गरेको अस्पतालको अभिलेखमा देखिन्छ ।