विराटनगर ।  मोरङ कारागारका जेलर धुब्रप्रसाद कोइरालाको सरुवाको माग राख्दै यहाँका  कैदी बन्दी आन्दोलित भएका छन् । जेलर कोइरालाले  कैदी बन्दीहरुलाई  अनावश्यक दुःख दिने गरेको भन्दै उनीहरू सोमबारदेखि आन्दोलित भएका हुन् ।

बिरामी भएर उपचारमा जान खोज्दा जेलर कोइरालाले रकम माग्ने गरेको यहाँका कैदीबन्दीहरुको आरोप छ । उपचारका लागि जान समेत नदिने गरेकोले बाध्य भएर आन्दोलनमा उत्रिनुपरेको उनीहरूको गुनासो छ । उनीहरूले  टाउकोमा कालो पट्टी बाँधेर कोइरालाविरुद्ध आन्दोलनमा उत्रिएका छन् । 

उनीहरूले ‘घुस खोर, भ्रष्ट्राचारी, कमिसन खोर जेलर चाहिँदैन, उपभोग्य बस्तु खरिद गर्न चौकीदारलाई बाहिर जान दिनपर्छ, मोरङ कारागारबाट भ्रष्ट्राचार जेलरको तत्काल सरुवा गर, कारागारभित्र आउने र कारागारबाट जाने उपभोग्य बस्तुमा जेलरले कमिसन माग्न पाइँदैन, उपचार गर्न जाँदा रकम माग्न पाइँदैन, लगायतका नारा लेखिएका प्लेकार्ड सहित प्रदर्शनमा उत्रिएका छन् । 

केही दिन अगाडी १२ जना कैदीबन्दीहरूले उपचारको लागि सहजीकरण गरिदिन माग राख्दै मानव अधिकार आयोग, नेपाल पत्रकार महासङ्घ कोसी प्रदेश सहित आधा दर्जन बढी निकायमा पनि पत्र पठाएका थिए ।  

यता मोरङ कारागारका जेलर कोइरालाले भने यस विषयमा आफूलाई जानकारी नभएको बताए ।  उनले कारागार व्यवस्था ऐन २०७९ को दफा २२ अनुसार कैदी बन्दीलाई उपचारमा लग्ने गरेको बताए । उनले कैदी बन्दीलाई स्वास्थ्यमा समस्या देखिएको खण्डमा कोसी अस्पतालमा चेकजाँच हुने बताए । कैदी बन्दीको आफूखुसी जुनमा मन लागो त्यही जाने व्यवस्था नभएको उनले बताए ।  मोरङ कारागारमा सोमबारसम्म १ हजार ६३ कैदी बन्दी छन् ।