विराटनर । मोरङ कारागारमा कैद भुक्तान गर्दै आएका एक दर्जन कैदीबन्दीहरुले उपचारको माग राखेका छन् ।

मोरङ कारागारका जेलर धु्रवप्रसाद कोइरालाले कैदीबन्दीको उपचारमा चासो नदेखाएपछि उनीहरुले उपचारमा सहजिकरण गरिदिन सरोकारवाला निकायसँग माग राखेका हुन् ।

मोरङ कारागारका १२ जना कैदीबन्दीहरुले उपचारको लागि सहजिकरण गरिदिन माग राख्दै मानव अधिकार आयोग , नेपाल पत्रकार महासंघ कोशी प्रदेशसहित आधा दर्जन बढी निकायमा पत्र पढाएका छन् ।

‘कारागार व्यावस्थापन विभागका अनुसार कोहि कैदिबन्दिहरु विरामी भएमा रोग र विरामी अनुसार आफ्नै खर्चमा हस्पिटल जान पाउने प्रावधान रहेको छ । तर मोरङ कारागारमा रहेका १२ जना बन्दिहरुलाई रकम नदिएकै भरमा जेलर कोइरालाले जान दिएका छैनन्,’ उनीहरुले पत्रमा उल्लेख गरेका छन् ।

पुर्पक्षका लागि मोरङ कारागारमा रहेका शेहँसा सिध्दिकी (अव्दुल खताव) रफुल मियाँ,दिपक दास,बलबहादुर नेपाल,ओम प्रकाश मण्डल,अक्षय मण्डल, साहिद मियाँ, काजीमान पुरी, शक्ति मण्डल, मो जहाँगिर लगायतले बारम्बार कारागार प्रशासनलाइ चिठ्ठि पठाउँदा समेत जेलर कोईरालाले कुनै हस्पिटल जान नदिएको उनीहरुको भनाई छ ।

‘कारागार प्रसाशनले उपचारका लागि पत्र दिएता पनी रकम नबुझाए पछी जेलरले हस्ताक्षर गर्दैनन् । उपचार गर्नका लागि जान पटक पटक पत्र पठाएता पनी रकम माग्ने गरेको र नदिए सम्म उपचारमा जान नपाउने गरेका छौं,’ कैदीबन्दीले हस्ताक्षर गरेको पत्रमा उल्लेख छ ।

मोरङ कारागारका जेलर कोइरालाले आफुलाइ थाहा नभएको र कैदीबन्दीले लगाएको यो सरासर गलत भएको बताए । ‘म कानुन अनुसार चल्ने हो,’ उनले भने, ‘कैदीबन्दी विरामी भए सरकारी हस्पिटलमा लैजाने हो । त्यहाँ उपचार हुन नसके चित्सिकको सिफारिसमा निजीमा पढाउने हो ।’ कैदीबन्दीको आफुखुसी जुनमा मन लागो त्यही जाने व्यवस्था नभएको उनले बताए ।