विराटनगर । विराटनगरको दुई ठूलो कपडा पसलमा राजस्व अनुसन्धान कार्यालय इटहरीले छापा मारेको छ ।
राजस्व अनुसन्धान टोलीले बुधबार दिउँसो विराटनगर मेनरोडमा रहेको नारायण स्टोर र अम्बिका बस्त्रालयमा छापा हानेर कागजपत्र नियन्त्रणमा लिएको हो ।

भारतबाट क्यारिङ मार्फत भन्सार छली गरी कपडा आयत गरेको विशेष सूचनाको आधारमा राजस्व अनुसन्धानले छापा मारेको बुझिएको छ । राजस्वबाट गएको टोलीले कपडा पसलको प्रज्ञापन पत्र, खरिद बिल र बिक्री विल लिएर अनुसन्धान सुरु गरिएको राजस्व अनुसन्धान कार्यालय इटहरीका प्रमुख खेमराज ओझाले जानकारी दिए ।

नन्दु किशोर तापडिया र किसन तापडियाले सञ्चालन गरेको नारायण स्टोर भारतको जोगबनीमा समेत रहेको छ । खुल्ला सीमाको फाइदा उठाउँदै भन्सार छलेर कपडा भित्र्याउने गरेको आरोप लाग्दै आएको छ ।

यसैगरी मेनरोडकै अम्बिका बस्त्रालयको समेत कागजात नियन्त्रणमा लिएर अनुसन्धान थालिएको छ । प्रदिप अग्रवाल सञ्चालन रहेको अम्बिका वास्त्रालय हो ।
‘अहिले कागजपत्र लिएर अनुसन्धान सुरु गरिएको छ,’ कार्यालय प्रमुख ओझाले भने, ‘खरिद बिल र विक्री बिल ल्याएर अनुसन्धान गरिएको छ । थप अनुस्न्धानपछि मात्र भन्सार छली भए नभएको पत्ता लाग्नेछ । अहिले केही भन्न सकिने अवस्था छैन ।’