विराटनगर । नेपाली कांग्रेसका महामन्त्री गगन थापाले गठबन्धनकै सरकार बन्ने दाबी गरेका छन् । विराटनगरमा मंगलबार कांग्रेस नेता गुरूराज घिमिरेले लेखेको ‘बाटो विराएको राजनीति’ नामक विचार संग्रह विमोचन कार्यक्रममा उनले यस्तो बताएका हुन् ।

‘सरकार गठबन्धनकै बन्छ । त्यसमा कुनै शंका छैन । गठबन्धनकै सरकार बनाउने भनेर चुनावमा गएका हौं । गठबधनको सरकार बनेपछि नेताहरुले निजी कम्पनी चलाएजस्तो पहिलाको जस्तै खासखास कानेखुसी गरेर तँ यो महिनासम्म, तँ यो महिनासम्म भनेर कोठाभित्र कागजमा तमसुक गर्छन्,’ उनले भने, ‘बाहिर भन्ने आँट गर्दैनन् । लुकाउँछन् । भित्रभित्र परिवारको सदस्यलाई म त बन्छु नि अबको मंसिरपछि भन्छन् । बाहिर भन्दैनन् । त्यही कुरामा अलि पछि बबण्डर गर्छन् ।’

सरकार बनाउन भन्दा सरकार बनाएपछि के गर्ने चिन्ता लिनुपर्ने उनले बताए । सरकारको कुनै निश्चित उद्देश्य नभएपछि काम गर्न नसकिने उनले बताए । गठबन्धनको सरकारले स्पष्टता दिनुपर्ने उनको भनाइ छ ।
उनले पाँच वर्षसम्म स्थिर सरकार बनाउनुपर्नेमा जोड दिए । सरकारमा बस्नेले शक्ति, स्रोत र सीमालाई ख्याल गर्नुपर्ने महामन्त्री थापाको भनाइ थियो । अर्थतन्त्र डामाडोल अवस्थामा भएकाले निर्वाचनमा उम्मेदवारले खटे जस्तै गरी सरकारले काम गर्नुपर्ने उनले बताए । अर्थतन्त्र सम्हाल्न सानो सोच र क्षमताले नहुने थापाको जिकिर थियो ।
गठबन्धन सरकारले समस्याको समाधान दिएर अगाडि बढ्ने उनको भनाइ छ । उनले कांग्रेसको लोकप्रिय मत घटेकोप्रति चिन्ता व्यक्त गरे । उनले भने, ‘प्रत्यक्षमा पनि हामी एक्लै लडेर ल्याएको होइन त्यति सीट । त्यसैले अब सरकार बनेपछि कामले देखाउन सक्नुपर्छ । काम गरेपछि मात्रै अबको पाँच वर्षपछि ४० प्रतिशतको पार्टी बन्नसक्छ । पार्टी आफैं बन्छ ।’