मोटरसाइकल र प्रेमिकाको विषयमा विवाद हुँदा साथीको हत्या  - News Birat

मोटरसाइकल र प्रेमिकाको विषयमा विवाद हुँदा साथीको हत्या 

न्यूज विराट

पोखरा, २ असार-पोखराका एक युवाको हत्या भएको रहस्य खुलेको छ । नयाँ मोटरसाइकल किनेको खुसियालीमा साथीहरूलाई पार्टी दिने क्रममा बाइक र प्रेमिकाका बारेमा बढेको विवादले उग्र रूप लिएपछि सँगै पार्टीमा रमाएका साथीहरूले नै अमित रसाइलीको हत्या गरेको खुलेको हो ।

पोखरा– ३२ का २१ वर्षे अमित रसाइलीलाई उनकै साथीहरूले हत्या गरेर सेती नदी किनारमा फालेको रहस्य खुलेको प्रहरीले जानकारी दिएको छ । रसाइलीको शव आइतबार बिहान ७ः१० बजे पोखरा–३२ स्थित सेती नदीको बीचमा भेटिएको थियो ।

शनिबार रातको करिब ९ बजे मोटरसाइकल किनेको खुसियालीमा साथीहरूलाई पार्टी दिन भनेर घरबाट हिँडेका उनी बेपत्ता भएका थिए । रसाइली हराएको भनी उनीसँगै पार्टी खाएका साथीहरूले नै आइतबार बिहान साढे ३ बजे खबर गरेपछि जिल्ला प्रहरी कार्यालय कास्कीले खोजतलास सुरू गरेको थियो । खोजतलासका क्रममा बिहान सेती नदीमा उनकाे शव भेटिएको थियो ।

प्रहरीले रसाइलीसँगै गएका ४ जना साथीहरूसँग सोधपुछ गर्ने क्रममा उनकै साथीहरूले हत्या गरी सेती नदीमा फालेको खुलेको कास्कीका प्रहरी प्रमुख एसपी दानबहादुर कार्कीले जानकारी दिए ।

मोटरसाइकल किनेको खुसियालीमा पोखरा– ३३, बाघमाराको चौरमा जम्मा भएर लोकल रक्सी, चाउचाउ र चुरोट खाँदै गफ गर्दा उनीहरूबीच बाइक र प्रेमिका कसको राम्रो भन्ने गफ गर्दागर्दै उनीहरूबीच झगडा भएको देखिएको कार्कीले बताए ।

झगडा सुरू भएपछि साथीहरूले अमितलाई हेल्मेट र ढुंगाले टाउकामै हिर्काएर हत्या गरेको खुलेको हो । अमितको मृत्यु भएपछि शव लुकाउन उनीहरूले सेती नदीको खोंचमा फालेका थिए ।

प्रहरीले अमितको हत्या गरेको आरोपमा २० वर्षे मनीष श्रेष्ठ, २१ वर्षे सुनम गुरूङ, २१ वर्षका शंकर सुनार र कृष्ण सुनारलाई पक्राउ गरी थप अनुसन्धान गरी रहेको जनाएको छ। प्रहरीले जिल्ला अदालत कास्कीबाट अनुमति लिई थप अनुसन्धान थालेको उनको भनाइ थियो ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles