विराटनगर । सुन र नगद लुटेर सुनसरीको धरान उपमहानगरपालिका – २० स्थित टोकेमा एक वृद्ध महिलाको हत्या गरिएको छ । लुटेराको समूहले स्थानीय ६५ वर्षीय पूर्णिामाया राईको सुन र नगद लुटेर हत्या गरिएको अवस्थामा आज दिउँसो शव फेला परेको हो ।

पूर्णिमाया एक्लै घरमा एक्लै बस्दै आएकी थिइन् । उनको शव मृत अवस्था घरमा फेला परेको सुनसरी प्रहरी प्रमुख एसपी प्रभु ढकालले जानकारी दिए । ‘प्रारम्भिक अनुसन्धानबाट वृद्ध महिलालाई हत्या गरेको देखिएको छ,’ एसपी ढकालले भने, ‘घटनाको अनुसन्धान भइरहेको छ ।’ घटनास्थलमा तालिमप्राप्त कुकुरलाई पनि लगेर अनुसन्धान सुरु भएको छ । अहिले घटनास्थलमा सुनसरी प्रहरी प्रमुख एसपी ढकाल स्वयम पुगेर घटनाको अनुसन्धान सुरु गरेका छन् ।

वृद्धा महिला एकै बस्ने गरेकोमा लुटेराहरूको समूहले सुन र नगद लुटेर हत्या गरिएको प्रहरीले जनाएको छ । हत्या गरिएकी महिला घरमा एक्लै बस्ने गरेको र घाँटीमा र कानमा सुनका गहना लगाउने गरेका कारण लुटेराहरूले हत्या गरेको हुनसक्ने प्रहरीले जनाएको छ । वृद्धा महिलाको चार छोरी र एक छोरा रहेका छन् । छोरीहरूको विवाह भएर गएको र छोरा पोखरामा बस्दै आएका छन् । श्रीमान् दुई वर्ष अगाडी मृत्यु भइसकेको प्रहरीले जनाएको छ ।