विराटनगर, १ साउन । पछिल्लो समय प्रदेश १ को राजधानी विराटनगरमा पुनः कोरोना संक्रमण बढ्दै गएको भन्दै महानगरपालिकाले स्वास्थ्य मापदण्ड पालना गर्न आग्रह गरेको छ ।

महानगरपालिकाले सूचना जारी गर्दै महानगरवासीलाई कोभिड संक्रमण बढीरहेकले सचेत हुन आग्रह गरेको हो । ‘अत्यावश्यक नभई घरबाट बाहिर नजान, अनावश्यकरुपमा भौतीक दुरी कायम गर्न तथा मास्कको प्रयोगलाई निरन्तरता दिन साथै जनस्वास्थ्यका सवै मापदण्डहरु पुरा गरि सहयोग गरिदिनुहुन सवैमा जानकारी साथ अनुरोध छ ।’ महानगरपालिकाको सहरी स्वास्थ्य महाशाखा प्रमुख रमेश कार्कीले जारी गरेको सुचनामा भनिएको छ ।

यसैबिच मोरङ कारागारका कैदीबन्दीहरुमा हालसम्म कोरोना संक्रमितको संख्या ५४ पुगेको छ । अत्यधिक ज्वरोका कारण गत बिहीबार एक कैदीको क्रममा विराटनगरस्थित कोशी अस्पतालमा मृत्यु भएपछि कारागार प्रशासनले परिक्षण सुरु गरेको थियो ।

शुक्रबार मात्रै ज्वरो आएका २३ कैदीबन्दीको एन्टिजेन परीक्षण गर्दा १९ जनामा पोजिटिभ रिपोर्ट आएको थियो । उस्तै लक्षण देखिएपछि थप ३९ जनाको पीसीआर परिक्षण गर्दा शनिबार ३५ जनामा कोरोना संक्रमण पुष्टि भएको कारागार प्रशासनले जानाएको छ ।