विराटनगर, २७ असार । मोरङको बुढीगंगा गाउँपालिका–४ स्थित मनमोहन प्राविधिक विश्वविद्यालय अन्तर्गतको स्कुल अफ इन्जिनियरिङले पठनपाठन सुरु गरेको छ । स्कुल अफ इन्जिनियरिङमा पहिलो ब्याचको पठनपाठन औपचारिकरुपमा सुरु भएको हो ।

स्कुल अफ इन्जिनियरिङले स्वागत तथा अभिमुखिकरण कार्यक्रम आयोजना गर्दै आफ्नो पहिलो ब्याचको शैक्षिक सत्र सुरु गरेको कार्यक्रमका अध्यक्ष तथा स्कुल अफ इन्जिनियरिङका डिन प्राध्यापक डा. प्रचण्डमान प्रधानले जानकारी दिए ।

विश्वविद्यालय सभा सदस्यहरू तथा बोर्ड अफ ट्रष्टिजका सदस्यहरू समेत उपस्थित सो कार्यक्रमलाई सम्बोधन गर्दै प्रदेश १ का पूर्व सामाजिक विकास मन्त्री सहकुलपति जीवन घिमिरेले विद्यार्थीहरू पहिला असल मानिस बनेमात्र असल इन्जिनियर बन्न सकिने बताए ।

कार्यक्रममा बोल्दै रजिष्ट्रार डा. दिलनाथ फूयालले शैक्षिक प्रशासनका नीति नियमहरू सुनाए । विश्वविद्यालयका सभा सदस्य सत्य नारायण चौधरीले विद्यार्थी र शिक्षकहरू दुवै अनुशासनमा रहि शैक्षिक कार्यमा अघि बढेमात्र राम्रो नतिजा ल्याउन सकिने बताए । कार्यक्रममा पूर्वमन्त्री मन्त्री तथा विश्वविद्यालय सभा सदस्य लालबाबु पण्डितले विश्वविद्यालयले शैक्षिक सत्र सुरु गरेकोमा खुशी व्यक्त गरे ।

कार्यक्रममा मन्तव्य राख्दै उपकुलपति डा. सुवासश्री पोख्रेलले विश्विद्यालयले चाँडै नै हेल्थ साईन्सको स्नातक कार्यक्रमहरू तथा इन्जिनियरिङको स्नातकोत्तर तहका कार्यक्रमहरू सुरु गरिने जानकारी दिए ।

कार्यक्रमा नयाँ भर्ना भएका विद्यार्थीहरूलाई डिन प्रा.डा. प्रचण्डमान प्रधान र विभागीय प्रमुख इ. नरेन्द्र डाँगीले फूलको गुच्छाले स्वागत गरेका थिए । कार्यक्रम सञ्चालन इ. युवराज चौधरीले गरेका थिए भने कार्यक्रमको संयोजन योजक डा. दिप रञ्जन डंगोलले गरेका थिए ।