विराटनगर, २१ वैशाख । प्रधानमन्त्री एवम् नेपाली कांग्रेसका सभापति शेरबहादुर देउवाले राष्ट्रिय आवश्यकताका आधारमा अहिलेको पाँचदलिय सत्ता गठबन्धन बनेको बताएका छन् ।

बुधबार विराटनगरमा नेपाली कांग्रस मोरङले आयोजना गरेको चुनावीसभालाई सम्बोधन गर्दै प्रधानमन्त्री देउवाले यस्तो बताएका हुन् । ‘म त चुनावकै पक्षमा थिएँ । सवैले ओलीलाई हटाऔँ भनेपछि मैले गठबन्धनको नेतृत्व गरेको हो ।’ उनले भने,‘सवैले आग्रह गरेपछि म प्रधानमन्त्री भएको हुँ ।’

उनले अहिलेको पाँच दलिय गठबन्धन प्रजातन्त्रको मलजल गर्नका लागि बनेकाले कुनैपनि शंका उपशंका नगर्न आग्रह गरे । प्रधानमन्त्री देउवाले निर्वाचनमा गठबन्धनभित्र नेपाली कांग्रेसले धोका नदिने बताए । ‘अहिलेको गठबन्धन प्रजातन्त्रलाई मलजल गर्नका लागि बनेको हो । त्यसैले गठबन्धनमाथि कुनैपनि शंका उपशंका नगर्नुहोला ।’ उनले भने,‘गठबन्धनभित्र कांग्रेसले धोका दिँदैन । त्यसैले हामीले उचाल्ने पछार्ने काम गर्नु हुँदैन ।’

उनले विराटनगरमा मेयरका कांग्रेस र उपमेयरमा जसपाका उम्मेदवारलाई कत दिएर जिताउन आग्रह गरे । उनले विराटनगरले पहाडी र मधेशी मिलेको शन्देश दिएको बताउँदै मेयरमा कांग्रेस र उपमेयरमा जसपाको छाता चिन्हको उम्मेदवारलाई मत दिन कार्यकर्ताहरुलाई निर्देशन दिए ।