विराटनगर, २१ वैशाख । नेपाली कांग्रेसका वरिष्ठ नेता रामचन्द्र पौडेलले जेष्ठ नागरिक सामाजिक सुरक्षा भत्ताको लोभमा एमालेलाई मत नदिन आग्रह गरेका छन् ।

बुधबार विराटनगरमा नेपाली कांग्रस मोरङले आयोजना गरेको चुनावीसभालाई सम्बोधन गर्दै वरिष्ठ नेता पौडलले जेष्ठ सामाजिक सुरक्षा भत्ता एमालेले सुरु गरेको बताउँदै त्यसैको लोभमा भोट दिन नहुने बताए । ‘एमालेले १ सय रुपैयाँबाट सुरु गरेको बृद्धभत्ताले के भएको छ र ? यसको भुलभुलैयामा नपर्नुहोला ।’ उनले भने,‘बरु हामीले मान्छे २० वर्ष भन्दा बढी बाँच्ने योजना बनाएका छौँ । त्यसैले गठबन्धनको पक्षमा मत हाल्नुहोस् ।’

उनले जनताले झण्डै दुईतिहाई मत दिएको कम्युनिष्ट पार्टीको असक्षमताका कारण मुलुकमा अस्थिरता कायम भएको बताउँदै स्थिरताका लागि गठबन्धन बनेको दावी गरे । ‘मुलुकमा भएको परिवर्तन, संविधान र लोकतन्त्रको रक्षाका लागि गठबन्धन बनेको हो ।’ उनले भने,‘ओलीबाट सुरु भएको अस्थिरतालाई स्थिरतामा बदल्न गठबन्धनको औचित्य हो ।’

वरिष्ठ नेता पौडेलले फेरीपनि विराटनगरमा कांग्रेसलाई जिताएपछि विराटनगरमा धेरै कुराको विकास हुने दावी समेत गरे ।