विराटनगर, २५ चैत । विराटनगरमा एक्लै बलियो अवस्थामा रहेको भन्दै नेपाली कांग्रेसले गठबन्धनमा आवद्ध कुनै दलसँग चुनावी तालमेल नगर्ने निर्णय गरेपछि गठबन्धनकै अरु दलमा छट्पटी सुरु भएको छ । कांग्रेससँग गठबन्धन गरेर भागवण्डा पाइने आशमा रहेका गठबन्धनमा आवद्ध माओवादी केन्द्र, जनता समाजवादी पार्टी, नेकपा एकीकृत समाजवादी र जनामोर्चामा छट्पटी सुरु भएको हो ।

सवै वडाका वडासभापति सहित बसेको नेपाली कांग्रेस विराटनगर महानगरसमितिको बैठकले वडातह सम्मै गठबन्धन नगर्ने निर्णय गरेको थियो । सो निर्णयपछि गठबन्धनका अन्य दल आफुहरुको अपमान गरेको भन्दै गुनासो गर्न थालेका छन् ।

गठबन्धनकै बलमा विराटनगरमा कमजोर अवस्थामा रहेका माओवादी केन्द्र र नेकपा (एस) र आफ्नो अस्तित्व स्थापित गर्ने दाउमा थिए । तर, कांग्रेसले भाउ नदिएपछि उनीहरु निरास बनेका छन् । विराटनगरमा माओवादी केन्द्र र नेकपा (एस) भन्दा जनता समाजवादी पार्टी बलियो अवस्थामा रहेको सो पार्टीका नेताहरुले बताएका छन् ।

नेपाली कांग्रेस विराटनगर महानगर समितिले विराटनगरमा गठबन्धन नगर्ने निर्णय गरेको सभापति दिपक चापागाईँले जानकारी दिए । ‘हामी विराटनगरमा एक्लै चुनाब लड्ने निर्णय गरेका छौँ । कुनै पनि पदमा अन्य दलसँग गठबन्धन हुँदैन ।’ उनले भने,‘सवै वडाका सभापतिसहिको बैठकबाट हामीले संस्थागत निर्णय गरेका छौँ । त्यसै अनुसार हाम्रो चुनावी तयारी छ ।’

मोरङकै सुनवर्षी नगरपालिकामा पनि नेपाली कांग्रेसले गठबन्धन नगर्ने निर्णय गरेको छ । केन्द्रको निर्देशन विपरित कांग्रेसका स्थानीय समितिहरुले निर्णय गर्दै जान थालेपछि सत्ता गठबन्धनमा आवद्ध अन्य दलहरु रुष्ट भएका छन् ।

उता केन्द्रमा भने सत्तारुढ ५ दलीय गठबन्धनले चुनावी तालमेलका पक्षमा संयुक्त वक्तव्य जारी गर्ने निर्णय गरेको छ ।

गठबन्धनको आज बसेको बैठकले तालमेलका पक्षमा देशव्यापी माहोल सिर्जना गर्न संयुक्त वक्तव्य जारी गर्ने निर्णय गरेको हो । गठबन्धनले चुनावी तालमेलको सैद्धान्तिक निर्णय गरेपछि पनि कतिपय जिल्लाहरूमा गठबन्धनमा रहेका दलहरुबीच सहमति नजुटेपछि केन्द्रीय शीर्ष नेताहरूले संयुक्त वक्तव्य जारी गर्न लागेको हुन् ।

प्रधानमन्त्री निवास बालुवाटारमा आज बसेको गठबन्धन बैठकमा विभिन्न जिल्लामा गठबन्धनमा देखिएका समस्याबारे छलफल भएको थियो । बैठकमा ६ महानगर र ११ उपमहानगरको नेतृत्व केन्द्रबाट नै टुंग्याउने विषयमा पनि छलफल भएको बताइन्छ ।