नेपाल आयल निगमले खरिद गर्ने पेट्रोलको मूल्य प्रतिलिटर १६ रुपैयाँले बढेर आएको छ । बुधबार इन्डियन आयाल कर्पोरेसनले पठाएको मूल्य सूचीअनुसार पेट्रोलमा १६ रुपैयाँ ३७ पैसा र डिजेलमा २४ रुपैयाँ ४९ पैसा मूल्य बढेको निगमका निर्देशक पुस्कर कार्कीले जानकारी गराएका छन् ।

यो मूल्य आएसँगै निगम सञ्चालक समितिको बैठक बसेर मूल्य समायोजनाको निर्णय गर्नेछ । बढेको मूल्यअनुसार अहिले आयाल निगमले खरिद गर्ने पेट्रोलको लागत प्रतिलिटर १८२ रुपैयाँ ८१ पैसा पुगेको छ । त्यस्तै डिजेलको मूल्य १६९ रुपैयाँ ४४ पैसा पुगेको छ ।

हालको बिक्री मूल्यको आधारमा पेट्राेलमा ३१ रुपैयाँ ८१ पैसार र डिजेलमा ३६ रुपैयाँ ४४ पैसा घाटामा रहेको छ ।

आयाल निगमले यसअघि नै सरकारको तर्फबाट लगानी नभएको अवस्थामा अब घाटामा बिक्री गर्न नसकिने तालुक मन्त्रालय उद्योग वाणिज्य तथा आपूर्ति मन्त्रालयमा जानकारी गराएको छ ।

नयाँ मूल्यअनुसार समायोजन नगरिए १५ दिनको अवधिमा निगमलाई थप ५ अर्ब ३१ करोड रुपैयाँ घाटा लाग्ने जनाइएको छ । फागुन मसान्तसम्म २८ अर्ब रुपैयाँ घाटा लागिसकेको दाबी निगमको छ ।