विराटनगर, १८ फागुन । मोरङको सुनवर्षी नगरपालिका वडा नम्बर २ मा तीन दिने उद्घोषण तालिम सम्पन्न भएको छ । सुनवर्षी–२ वडा कार्यालयको आयोजना तथा सञ्चारकर्मी मिडिया प्रालिको समन्वयमा तीन दिने उद्घोषण तालिम बुधबार सम्पन्न भएको हो ।

गत फागुन १६ गतेदेखि सुरु भएको तालिममा सो वडाका २० जना युवा युवतीहरुलाई सैद्धान्तिक र प्रयोगात्मकरुपमा उद्घोषण कला सिकाइएको थियो ।

समापन कार्यक्रममा अमरदह प्रहरी चौकीका इन्चार्ज धोकबहादुर थापाले उद्घोषण कलाले युवा युवतीको व्यक्तित्व र क्षमता विकासमा महत्वपूर्ण टेवा पुग्ने बताए ।

उनले कुनैपनी कार्यक्रम सफलतापूर्वक सम्पन्न गर्नका लागि उद्घोषकको महत्वपूर्ण भूमिका हुने भएकाले तालिममा सिकेको शिपको सदुपयोग गर्न आग्रह गरे ।

कार्यक्रममा सुनवर्षी नगरपालिका–२ की वडा सदस्य जस्मतीया ऋषिदेव, स्थानीय समाजसेवी श्रीप्रसाद दाहाल, प्रशिक्षक विरेन्द्रकुमार साह, पत्रकार सन्तोष बास्तोला, नरेश माझि लगायतले तालिममा सहभागिले उत्साहपूर्वक सहभागिता जनाएको बताए । उनीहरुले उद्घोषण तालिम लिएका सवै सहभागीले प्रयोगात्मक र व्यवहारिकरुपमा तालिम लिएर उत्कृष्ट प्रस्तुती गरेकोका प्रसंसा गरे ।

तालिममा सहभागि मध्येबाट सरिता घिमिरे, राधा साह, माधव गुरागाईँ र रोजिना अधिकारीले तालिमबाट निकै आत्मविश्वास बढेको बताए । उनीहरुले यसअघि उद्घोषणबारे सुनेपनि उद्घोषण्को तरिकाबारे जानकारी नभएको बताउँदै तालिम लिएपश्चात आफै उद्घोषण गर्न सक्ने बनेको बताए ।

उनीहरुले तालिममा सहभागि सवैले मञ्चमा कार्यक्रम सञ्चालन र आफ्ना बिचारहरुसमेत राख्न सक्ने भएको बताए । सो अबसरमा तालिममा उत्कृष्ट बनेका सहभागि प्रकृती अधिकारी, राधा साह, सरिता घिमिरे र आयुषा राईलाई पुरस्कृत गरिएको थियो । तालिममा सहभागी सवै जनालाई प्रमाणपत्रसमेत वितरण गरिएको थियो ।

समापन कार्यक्रम तालिममा उत्कृष्ट भएकी प्रशिक्षार्थी प्रकृती अधिकारीले सञ्चालन गरेकी थिइन् । उनलाई तालिममा सिकेको शिपलाई व्यवहारिक रुपमा प्रयोग गर्नका लागि कार्यक्रम सञ्चालको अवसर दिइएको थियो । उनले सो कार्यक्रम उत्कृष्ट ढंगले सञ्चालन गरेकी थिइन् ।