विराटनगर, १८ फागुन । विराटनगरमा महिला उद्यमीहरुले उत्पादन गरेका वस्तुहरुको प्रदर्शनी हुने भएको छ । ११२ औँ श्रमिक महिला दिवसको अवसर पारेर नेपाल घरेलु तथा साना उद्योग महासंघ मोरङले आगामी फागुन २३ गते विराटनगरमा महिला उद्यमीहरुद्वारा उत्पादित वस्तुहरुको प्रदर्शनी आयोजना गरेको हो ।

नेपाल घरेलु तथा साना उद्योग महासंघ मोरङ र महिला उद्यम समितिले दिवसको अवसर पारेर शुभकामना आदानप्रदान, उत्कृष्ट महिला सम्मान र एक दिने महिला उद्यमीहरुद्वारा उत्पादित वस्तुहरुको प्रदर्शनी कार्यक्रम आयोजना गरेका हुन् ।
‘मेहनत, सृजना, उत्पादन र वस्तु, मेरै नेपालको/उद्योग गरौँ, उद्योगी बनौँ, उठाऔँ नेपाल’ भन्ने मुल नारासहित दिवश मनाउन लागिएको नेपाल घरेलु तथा साना उद्योग महासंघ मोरङका अध्यक्ष चेतन निरौलाले जानकारी दिए ।

प्रदेश १ की सामाजिक विकास राज्यमन्त्री विष्णु तुम्बाहाम्फेको प्रमुख आतिथ्यतामा विराटनगरस्थित इन्द्रेणी पार्टी प्यालेसमा हुने कार्यक्रममा तीन जना उत्कृष्ट तीन जना महिलाहरुलाई सम्मान समेत गरिने छ ।

प्रदर्शनीमा जिल्लाभरीका महिला उद्यमीहरुले उत्पादन गरेका जुत्ता, चप्पल, व्याग, ढाका तथा अल्लोका कपडा, हस्तकलाका सामाग्री, कृषि उत्पादनहरु, व्यागहरु, सृङ्गारका सामाग्रीहरु, मह, अचार, चियालगायतका वस्तुहरु प्रदर्शन गरिने अध्यक्ष निरौलाले बताए ।

कार्यक्रममा विभिन्न संघ संस्था तथा कार्यालयका महिला, महिला उद्यमी, व्यवसायी र श्रमिक महिलाहरुको सहभागिता रहने नेपाल घरेलु तथा साना उद्योग महासंघ मोरङ महिला उद्यम समितिकी अध्यक्ष सुनिता छाराहाङले जानकारी दिइन् ।