प्रतिनिधिसभाको बैठक आज (आइतबार) बस्दैछ । बैठक दिउँसो १ बजे बस्न लागेको हो । संघीय संसद् सचिवालयले सार्वजनिक गरेको सम्भावित कार्यसूची अनुसार बैठकका लागि आज एउटा मात्रै एजेन्डा राखिएको छ ।

प्रधानमन्त्री शेरबहादुर देउवाले राष्ट्रिय समावेशी आयोगको प्रतिवेदन २०७७/०७८ पेस गर्नेमात्रै कार्यसूची रहेको छ । सम्भावित कार्यसूचीमा अमेरिकी सहयोग परियोजना एमसीसी अटाएको छैन ।

शनिबार प्रकाशित कार्यसूचीमा आइतबार पुनः फेरबदल गर्न सकिने व्यवस्था भएकाले अन्य विषय पनि थपिन सक्छन् । बैठकका अन्य कार्यसूची तय गर्न सभामुख अग्नि सापकोटाले बिहान साढे ११ बजे कार्यव्यवस्था परामर्श समितिको बैठक बोलाएका छन् ।

सरकारले आजकाे बैठकमा एमसीसी संसदबाट अनुमोदनका लागि टेबल गर्ने तयारी गरिरहेको छ । तर, सत्ता गठबन्धनकै दल नेकपा माओवादी केन्द्र भने टेबल गर्न नदिने पक्षमा छ । अर्को सत्तारुढ दल नेकपा एकीकृत समाजवादीले भने एमसीसी टेबल गर्न दिइने निर्णय लिएको छ ।

यसैबीच एमसीसीमा सहमति जुटाउन सत्ताधारी गठबन्धनको ‘निर्णायक बैठक’ आज बस्दैछ । दिउँसो १ बजे बस्ने प्रतिनिधिसभाको बैठकअघि बिहान १० बजे गठबन्धनका शीर्ष नेताहरूको बैठक प्रधानमन्त्रीको सरकारी निवास बालुवाटारमा बस्न लागेको हो ।

यसअघि एमसीसीबारे शुक्रबारकै बैठकमा निर्णय लिइने तयारी भए पनि सत्ता घटक नेकपा एकीकृत समाजवादीको आग्रहमा दुई दिन पर धकेलिएको हो । एकीकृत समाजवादीको हिजो बसेको बैठकले नेपाली का‌ंग्रेसलाई साथ दिँदै एमसीसी सदनमा टेबल हुन दिने निर्णय गरेको छ । तर अनुमोदनका लागि भने यथास्थितिमा पक्षमा मतदान नगर्ने निर्णय पार्टीले गरेको छ ।