विराटनगर, २० माघ । विराटनगरमा प्रदेश १ का मुख्यमन्त्री राजेन्द्र राईलाई कालो झण्डा देखाउने क्रममा नेकपा (एमाले) कार्यकर्ता र प्रहरीबिच झडप भएको छ । झपमा अनेरास्ववियु उपमहासचिव भाष्कर खनालसहित आधादर्जन कार्यकर्ता घाइते भएका छन् ।

प्रदेश १ का मुख्यमन्त्री राईलाई कालो झण्डा देखाउन खोज्ने नेकपा एमाले निकट अनेरास्ववियु, युवा संघ र प्रहरीबीच बिहीबार घम्साघम्सी भएको हो । काठमाडौंबाट विराटनगर आउँदै गरेका मुख्यमन्त्री राईलाई कालो झण्डा देखाउन विद्यार्थीहरु विराटनगर विमानस्थल रोडमा भेला भएका थिए। कालो झण्डा देखाउने थाहा भएपछि एयरपोर्ट मोडदेखि एयरपोर्टसम्म बाक्लो रुपमा सुरक्षाकर्मी परिचालन गरिएको थियो ।

मुख्यमन्त्री राई विराटनगर ओर्लिएलगत्तै मुख्यमन्त्री कार्यालय जानेक्रममा विद्यार्थीले कालोझण्डा देखाउन खोज्दा प्रहरीले बल प्रयोग गरेको थियो। सो क्रममा विद्यार्थी र प्रहरीबीच केही बेर घम्साघम्सी भएको थियो। कालोझण्डा देखाउन खोज्दा प्रहरीले अनेरास्ववियु उपमहासचिव भाष्कर खनाललगायतका विद्यार्थी नेताहरुलाई दुर्व्यवहार गरेको विद्यार्थी नेता तुलसी घिमिरेले बताए।

प्रदेश १ मा मन्त्रालय फुटाएर १२ वटा बनाउने सरकारको निर्णय फिर्ताको माग गर्दै एमाले निकट विद्यार्थी संगठन अनेरास्ववियु आन्दोलित छ। सरकारले निर्णय फिर्ता नलिए मन्त्रीहरुका गाडी चल्न नदिने अनेरास्ववियुको चेतावनी छ। जनताको करको दुरुपयोग गरेर मुख्यमन्त्री राईले सत्ता टिकाउनका लागि मन्त्रालय फुटाउने काममा उद्यत भएको उनीहरुको आरोप छ।