काठमाडौं, १० माघ । एनआईसी एशिया बैंकको बोनस शेयर वितरणमा रोक लगाइएको छ । गत मंसिर पहिलो साता नै एनआईसी एशिया बैंकले वार्षिक साधरणसभा डाक्नुपहिले फाइल स्वीकृतिको लागि राष्ट्र बैंकमा पठाएको थियो ।

तर, राष्ट्र बैंकले एक महिनापछि गत पुस पहिलो साता बोनस बाँड्नको लागि पुँजी काेष पर्याप्त नपुग्ने भन्दै सच्चाएर ल्याउन भनेकाे थियाे ।

एनआईसीले त्यसो गर्न नमानेपछि राष्ट्र बैंकले बोनस शेयर वितरणमा राेक लगाउने निर्णय लिएकाे हाे ।

राष्ट्र बैंकले यसअघि यसरी बोनस शेयरमा रोक लगाएको थिएन । एनआईसी एशियाले गत वर्षको आम्दानीबाट १५ प्रतिशत बोनश शेयर र ०.७९ प्रतिशत नगद लाभांश दिने प्रस्ताव लैजाने गरी सञ्‍चालक समितिबाट पास गराएको थियो ।

तर, राष्ट्र बैंकको प्रावधानअनुसार, लाभांश तथा बोनस दिन ११ प्रतिशत पुँजीकोष र त्यसमध्ये ८.५ प्रतिशत प्राथमिक पुँजी पुर्‍याउनुपर्ने हुन्छ । एनआईसीको पुँजीकोष ८.१ प्रतिशत मात्रै पुगको छ । यसै आधारमा राष्ट्र बैंकले बोनस शेयर वितरणमा रोक लगाएकाे हाे । योसँगै शेयर लगानीकर्ताको हात खाली हुने भएको छ ।

राष्ट्र बैंकको एकीकृत निर्देशिका, २०७७ अनुसार आर्थिक वर्षको बीचमा कुनै अवधिमा न्यूनतम पुँजीकोष कायम गर्न नसकेको अवस्थामा आर्थिक वर्षको अन्त्यसम्म पूरा गर्न सक्ने सुविधा थियो ।

तर, एकीकृत निर्देशिका-२०७८ मा भने कुनै अवधिमा न्यूनतम पुँजीकोष पूरा गर्न नसके पनि सोही वर्षको अन्त्यमा पूरा गरेका कारण नगद लाभांश वा बोनस शेयर वितरण गर्न नपाइने व्यवस्था छ ।

राष्ट्र बैंकका अधिकारीहरूले अघिल्लो निर्देशिका अनुसार एनआईसीको विवरण देखिएको भन्दै अहिलेको नियमअनुसार वितरण गर्न नपाइने बताएका छन् ।

आक्रामक रूपमा कर्जा विस्तार गर्दै आएको यो बैंकले नियामकीय निकायले तोकेको सर्त पालना गर्न नसकेको हाे । यस बैंकमाथि मनपरी रूपमा कर्जा विस्तार गरेको र कर्जा उठाउन अपरिचित व्यक्तिहरू प्रयोग गर्ने गरेको आरोप लागेको छ ।