विराटनगर,१५ मङ्सिर । प्रदेश नं १ का मुख्यमन्त्री राजेन्द्रकुमार राईले गठवन्धनमा रहेका केही पार्टीहरुको राष्ट्रिय तथा जिल्ला अधिवेशन चलिरहेकोले प्रदेश मन्त्रीपरिषदले पूर्णता पाउन ढिलाई भएको बताउनु भएको छ।

मुख्यमन्त्री राई नेपाल पत्रकार महासङ्घ मोरङ शाखाको आज अनुगमन पश्चात सञ्चारकर्मीहरुसंग संक्षिप्त कुराकानी गर्दै उहाँले कार्य क्षेत्र मिलाएर मन्त्रीको सङख्या केही वढाउने सम्वन्धमा गठवन्धन दलहरुवीच आन्तरिक तयारी भैरहेको र बैठक वसी चाँडै मन्त्रिमण्डललाई पूर्णता दिने जानकारी दिनुभयो ।

उहाँले विगतको सरकारले पेश गरेको बजेट पुनरावलोकन हुने बताउदै आर्थिक श्रोत साधन कसरी जुटाउने तथा अनावश्यक राखिएको बजेटको कटौती हुने बताउनु भयो । मुख्यमन्त्री राईले व्यक्ति कुन पार्टी हो नभनी रित नपुगी विगतको सरकारले गठन गरेको वोर्डहरुलाई सच्चाउने जानकारी दिनु भयो ।

उहाँले गठवन्धन दलको न्यूनतम साझा कार्यक्रमको खाका तयार भैसकेको जानकारी दिदै दलहरुलाई मेल पठाएको वैठक वसी सार्वजनिक गरिने बताउनु भयो । मुख्यमन्त्री राईले प्रदेशको नाम राख्नका लागि कार्य दल गठन गर्ने,प्रकिया आगाडि वढाउने र संसदको वैठकमा प्रवेश गराई वहुपक्षीय छलफल एवं सहमतीमा टुङग्याउन सरकारको ध्यान गएको प्रष्ट पार्नु भयो ।