प्रधानन्यायाधीश चोलेन्द्र शमशेर जबरामाथि शीघ्र छानबिन गरी स्वतन्त्र न्यायपालिका कायमको माग राख्दै नागरिक अपिल जारी भएको छ ।

सोमबार अर्चना थापा, अञ्जना शाक्य, अनिता थपलियालगायतले नागरिक अपिल जारी गर्दै प्रधानन्यायधीशको अविश्वसनीय गतिविधि, कार्यसम्पादन तथा न्यायिक कार्यक्षमतामाथिको प्रश्न, उनीमाथि लागेको भ्रष्टाचारलगायत न्यायिक विचलनको सवाललाई तत्काल सम्बोधन गर्नुपर्ने जनाएको हो ।

‘न्यायपालिकाको नेतृत्वमाथि मूलतः प्रधानन्यायधीश चोलेन्द्र शमशेर जबराविरुद्ध नेपाल बार एसोसिएसन आन्दोलनरत् छ भने सर्वोच्च अदालतभित्रका बहुसंख्यक न्यायाधीशहरूले पनि बेन्च वहिष्कार गरेको अवस्था छ । न्यायपालिकामा भएका अनियमितताका सवालहरू सतहमा आएका छन् । यसले सिङ्गो न्यायपालिकाको साख र सम्मानमा आँच आएको छ,’ अपिलमा भनिएको छ, ‘यसले मानव अधिकार, न्यायमा पहुँच तथा कानुनको शासन कार्यान्वयनमा थप चुनौती रहेको पुष्टि गरेको छ ।’

सर्वोच्च अदालतमा भइरहेको बेथितिलाई निकास दिनुको साटो सरकार मौन बसेको भन्दै अपिलमा यसले समग्रमा सामान्य नागरिकहरू त्यसमा पनि महिला तथा सीमान्तकृत वर्गको न्यायमा पहूँचको सवाल चुनौति बनेको उल्लेख छ ।

‘प्रधानन्यायधीशको अविश्वसनीय गतिविधि, कार्यसम्पादन तथा न्यायिक कार्यक्षमतामाथिको प्रश्न, उनीमाथि लागेको भ्रष्टाचारलगायत न्यायिक विचलनको सवाललाई तत्काल सम्बोधन गर्नुपर्ने अवस्था छ,’ अपिलमा भनिएको छ, ‘यसका निमित्त निजमाथि शीघ्र छानबिन गरी स्वतन्त्र न्यायपालिका कायम गर्न हामी स्वतन्त्र नागरिक, नागरिक संस्थाका प्रतिनिधिहरू सरकारसित जोडदार माग गर्दछौँ ।’