विराटनगर, २९ कात्तिक । विराटनगरसँगै जोडिएको मोरङको बुढीगंगा गाउँपालिकामा युवाहरुबिच ‘ग्याङ फाइट’ हुँदा एक युवकको मृत्यु भएको छ । बुढीगंगा गाउँपालिका–६ स्थित कोयलपुरमा गएराति युवाहरुबीच ग्याङ फाइट हुँदा धनकुटा पाख्रीबासका रिजन दाहालको मृत्यु भएको हो । पाख्रीबास घर भएका दाहाल इटहरी उपमहानगरपालिका–१३ स्थित खनारमा डेरा गरेर बस्दै आएका थिए ।

बढीगंगा ६ का नानु लिम्बूको भतिजीको बर्थडे मनाउन रिजन आइतबार राती उनको घर गएका थिए । बर्थडे पार्टी मनाउने क्रममा मदिरा सेवन गरेर आएका युवाहरुबिच विवाद हुँदा ‘ग्याङ फाइट’ भएको थियो ।

बुढीगंगा–६ का २३ वर्षीय धनबहादुर तामाङ, २४ वर्षीय ईश्वर भनिने लिखमान लिम्बू र सुनसरीको इटहरी–११ का २२ वर्षीय राजु तामाङ लगायतको समुहसँग दाहालेको विवाद भएको थियो । विवाद बढदै गएपछि दाहाललाई ती युवाको समुहले स्थानीय डम्बर बाहदुर लिम्बुको बारीमा लगेर खुकुरी प्रहार गरेका थिए ।

टाउँकोमा खुकुरी प्रहार गरिएपछि गम्भीर घाइते भएका उनको उपचारका लागि लैजाँदै गर्दा बाटोमै मृत्यु भएको जिल्ला प्रहरी कार्यालय मोरङका प्रवक्ता प्रहरी नाउव उपरिक्षक दिपक श्रेष्ठले जानकारी दिए । उनले दाहाललाई सात जनाको समूहले खुकुरी प्रहार गरेको बताए ।

प्रवक्ता श्रेष्ठका अनुसार मृतक दाहालको शव पोस्टमार्टमका लागि विराटनगरस्थित कोसी अस्पताल विराटनगरमा राखिएको छ । सो घटनामा नानु लिम्बु र कमल थापा पनि घाइते भएका छन् । लिम्बुको दाँया हातमा चोटपटक लागेको प्रहरीले जनाएको छ । झगडा छुट्याउने क्रममा उनीहरु घाइते भएका हुन् ।

घटनाको अनुसन्धानका लागि मोरङ प्रहरीले दुई युवकलाई नियन्त्रणमा लिएको छ । बुढीगंगा–७ का २५ वर्षीय अजय श्रेष्ठ र धनकुटा–४ दव्रेबासका २४ वर्षीय कमल थापालाई नियन्त्रणमा लिएर अनुसन्धान सुरु गरिएको प्रहरीले जनाएको छ ।