विराटनगर, २ कात्तिक । सोमबारदेखि परेको अविरल वर्षाका कारण इटहरी डुबानमा परेको छ । इटहरीस्थित बिभिन्न खोलाहरूमा आएको बाढीका कारण शहरदेखि भित्री गाउँसम्म डुबानमा परेको हो । वर्षाका कारण इटहरीका अधिकांश भूभागहरू जलमग्न बनेका छन् भने सयौं घरहरूसमेत डुबानमा परेका छन् ।

लगातार परेको पानीले किसानहरूलाई ठुलो मार्कामा पारेको छ । दशै सकिएर थन्काउन लागेको धान खेत बगरमा परिणत भएपछि कृषकहरू मार्कामा परेका हुन । स्थानीय खोलाहरूमा आएको बाढीका कारण कोसी राजमार्ग अवरूद्ध बनेको छ । अविरल वर्षाका कारण इटहरी–२० तरहराको पानीपिया क्षेत्र पनि डुबानमा परेको छ ।

इलाका प्रहरी कार्यालय इटहरीका डिएसपी अर्जुन केसीका अनुसार सो क्षेत्रका ६ घरका १५ जनालाई नेपाली सेना, नेपाल प्रहरी र सशस्त्र प्रहरी तथा स्थानीयको सहयोगमा उद्धार गरिएको छ । निरन्तरको वर्षाले इटहरीका अधिकांश स्थानमा बाढी पसेको छ । त्यस्तै विभिन्न ठाउँबाट धरान जाने सबै सवारी साधन तरहरामा रोकिएका छन् । पानीपियामा बाढी पसेपछि सबै सवारी साधन तरहरामामै रोकिएपछि सयौं यात्रुहरु अलपत्र परेका छन् ।