विराटनगर, २ कात्तिक । मोरङको कर्सियास्थित सिटिजन्स बैंकको शाखामा लुटपाट गर्ने थप एक जनालाई प्रहरीले पक्राउ गरेको छ । मोरङको धनपालथान गाउँपालिका–४ कर्सियस्थित सिटिजन्स बैंकको शाखा लुटपाटमा संलग्न मध्ये थप एक जनालाई प्रहरीले पक्राउ गरेको हो । पक्राउ पर्नेमा भारतको अररीया जिल्लाका २२ वर्षीय रोशन यादव रहेका छन् ।

प्रहरीको विशेष टोलीले यादवलाई पेस्तोलसहित भारतबाटै पक्राउ गरेर ल्याएको प्रहरी स्रोतले जनाएको छ । स्रोतका अनुसार यादव बैंकबाट लुटपाट गरेको रकम लिएर फरार भएका थिए । प्रहरी स्रोतका अनुसार यादव बैंक लुटपाटका मुख्य अभियुक्त समेत हुन् ।

यसअघि बैंक लुटपाट भएकै दिन लुटेरा समुहका तीन जनालाई प्रहरीले पक्राउ गरेको थियो । प्रहरीले यसअघि लुटपाट भएकै दिन भारतको अररीया जिल्लाको शिवपुरदेखि ३२ वर्षीय सुनिल यादव, भारत गौराहाका ३५ वर्षिय बिजय बहरदार र विराटनगरका ३२ वर्षीय श्याम मुखियालाई पक्राउ गरेको थियो ।