एजेन्सी, ८ असोज । भारतको राजधानी दिल्लीस्थित एक अदालतमा फाइरिङ भएको छ । उक्त गोली हानाहानमा परी तीन जनाको मृत्यु भएको भारतीय सञ्चारमाध्यमले जनाएका छन् ।

बीबीसीका अनुसार दिल्लीस्थित ‘रोहिणी कोर्ट’को कोर्ट नम्बर एकबाहिर फाइरिङ भएको हो ।

उक्त फाइरिङमा परी जितेन्द्र मान गोगीनामका ग्याङ्गस्टारको मृत्यु भएको छ । गोगीमाथि गोली प्रहार भएपछि प्रहरीले जवाफी फाइरिङ गर्दा अरू दुई जना आक्रमणकारीको मृत्यु भएको समाचारमा जनाइएको छ । त्यस्तै एक महिला वकिलसहित तीनजना घाइते भएका छन् ।

आक्रमणकारीहरूले वकिलको ड्रेस लगाएर आएका थिए । उनीहरू गोगीलाई मार्ने उद्देश्यले अदालत पुगेको समाचारमा जनाइएको छ ।

दिल्ली प्रहरीले एक मुद्दाको सुनुवाइका लागि गोगीलाई अदालत लगेको थियो । जितेन्द्र गोगीमाथि हत्या, लुटलगायत अरु संगीन मुद्दा दर्ता भएको समाचारमा जनाइएको छ । गोगीलाई तिहाड जेलमा राखिएको थियो ।