बृहत् नागरिक आन्दोलनले ‘संविधान संशोधन मार्च’ गर्ने भएको छ । नेपालको संविधान जारी भएको दिन (असोज ३) को अवसरमा उक्त मार्च गर्न लागिएको बताइएको छ । बृहत् नागरिक आन्दोलनले उक्त मार्चमा सहभागी हुन सबैपक्षलाई आह्वान गरेको छ ।

आइतबार (३ असोज) दिउँसो २ बजे माइतीघरमा भेला भएर नयाँ बानेश्वरस्थित संसद भवनअगाडि मार्च गरिने बृहत् नागरिक आन्दोलनले एक विज्ञप्तिमार्फत जानकारी दिएको छ ।

संविधान जारी गर्दा असन्तुष्ट भएका समुदायहरूलाई हालस्म पनि विश्वासमा लिने प्रयास नभएको तथा संविधान अधुरो र अपुरो रहेको बृहत् नागरिक आन्दोलनको ठम्याइ छ ।

‘संविधान जसरी बनाइयो त्यसप्रति असन्तुष्ट समुदायहरूलाई हालसम्म पनि विश्वासमा लिने कुनै राजनीतिक प्रक्रिया सुरू गरिएको छैन,’ विज्ञप्तिमा भनिएको छ, ‘संविधान अधुरो र अपुरो छँदैछ, त्यसलाई पूर्ण र स्वामित्वसहितको बनाउन पूरा नभएका मुद्दाहरू सम्बोधन गर्नेतर्फ राज्यको पहल समेत भएको छैन ।’

जनआन्दोलन र जनसंघर्षबाट स्थापित मुद्दालाई अधकल्चो पार्दै, जनतासँग परामर्श नगरी, द्रूतमार्गबाट संविधान जारी गरिएकोमा बृहत् नागरिक आन्दोलनको असन्तुष्टि छ । संविधान जारी गर्ने क्रममा मधेशी, थारूलगायतका आन्दोलनहरूमाथि निर्मम दमन गरिएको पनि विज्ञप्तिमा उल्लेख छ ।

‘हामीले गत ७ फागुन प्रजातन्त्र दिवसका दिन तिनिख्यः (टुँडिखेल) मा जारी गरेको नागरिक घोषणापत्रमा जनताका आधारभूत हक, अधिकारसहित सबै न्यायपूर्ण माग सम्बोधन गर्ने गरी पुनर्लेखन र संशोधनमार्फत संविधान अद्यावधिक गर्नुपर्ने र राज्य व्यवस्थामा नागरिक सर्वोच्चता कायम गर्नुपर्ने ठहर गरेका थियौँ,’ विज्ञप्तिमा भनिएको छ ।

संविधान विरोधाभाषपूर्ण रहेको भन्दै बृहत् नागरिक आन्दोलनले सार्वजनिक सेवासमेतको व्यापारीकरणले समाजमा असमानताको खाडल चर्काउँदै लोकतन्त्रलाई दुरुह बनाएको पनि जनाएको छ ।

‘राज्यका सर्वोच्च निकायका पदाधिकारीहरूले निरन्तरता दिइरहेको पुरानै शासकीय शैली र रवैयाको संवैधानिक उपचार गरी मितव्ययी, पारदर्शी र जनप्रीय संस्था निर्माण हुनुपर्छ भन्ने हाम्रो अडान छ,’ विज्ञप्तिमा भनिएको छ ।