विराटनगर, ४ भदौ । सिउँडी जातको पोषिलो फलफूलका रूपमा चिनिने ड्रागन खेतीमा पछिल्लो समय कृषकको आकर्षण बढ्दै गएको छ । खेती सुरु गरेको दोस्रो वर्षदेखि नै राम्रो फल दिने र आम्दानी पनि हुने भएपछि यसको खेतीतर्फ आकर्षण बढेको छ । मोरङको सुन्दरहरैँचा नगरपालिका वडा –४ का नवीन दाहालले १२ कट्ठामा गरेको ड्राइगन खेतीबाट राम्रो आम्दानी गर्दै आउनु भएको छ ।

खेती सुरु गरेको दोस्रो वर्ष देखि नै फल दिन थालेको र चाँडै राम्रो आम्दानी हुने देखेपछि आफू झनै हौसिएको उहाँले बताउनुभयो । आफूले ड्रागनखेती गर्न मिडियाबाटै प्रेरणा पाएको उहाँले बताउनुभयो ।

राम्रो आम्दानी हुने भए पछि पछिल्लो समय यो खेती गर्नेको सङ्ख्या ह्वात्तै बढेको पाइन्छ । दाहालले ड्राइगनका लागि ठूलो लगानी गर्नुभएको छ । पानी जम्ने होचो ठाउँ भएकोले यसलाई उठाउन एक करोडको लगानी गर्नु परेको उहाँले बताउनुभयो ।

ड्रागन फ्रुट्सको एउटै बोटबाट पनि अरू बिरुवाको वृद्धि विकास गर्न सकिन्छ । एक पटक बिरुवा लगाएपछि समय समयमा सामान्य गोडमेल र सिँचाइ बाहेक अन्य गोडमेल गर्नु नपर्ने र रोपेको २ वर्षदेखि लगातार लामो समय सम्म फल दिने हुनाले अन्न खेतिवालीको तुलनामा यसको खेतीबाट राम्रो आम्दानी लिन सकिने कृषक दाहालको अनुभव रहेको छ ।

कृषिकर्ममा राम्ररी रमाएका दाहाललाई उहाँकी श्रीमती सुशीला दाहालको पनि उतिकै साथ रहेको छ ।उहाँ श्रीमानलाई कृषिकर्ममा साथदिन पाएकोमा खुशी हुनुहुन्छ ।

कृषि क्षेत्रको विकासका लागि राज्यले विभिन्न कार्यक्रम ल्याए पनि ती कार्यक्रमको फाइदा भने वास्तविक किसानले भन्दा पनि पहुँचका भरका मानिसले पाउने गरेको दाहाल बताउनुहुन्छ । झोले किसानले गर्दा आज वास्तविक किसानको अधिकार खोसिएको उहाँको गुनासो छ । यद्यपि आफूले राज्यले अनुदान देला भनेर काम नगरेको दाहाल बताउनुहुन्छ ।

वास्तविक कृषि कर्ममा नलागेपनि अनुदानका लागि मरिहत्ते गर्नेहरुका लागि दाहाल दम्पती एक उदाहरण हुन् । उनीहरूको उत्प्रेरणबाट धेरै कुरा सिक्न सकिन्छ ।