धनुषामा टिपरले किचिएको अवस्थामा चालकको शव फेला परेको छ । आफैँले चलाउने टिपरे किचिएको अवस्थामा २९ वर्षीय टिपर चालक बुद्ध तामाङको शव फेला परेको हो ।

प्रहरीका अनुसार तामाङ उदयपुरको कटारी नगरपालिका- २ का स्थायी बासिन्दा हुन् ।

स १ ख ९०९ नम्बरको टिपरले किचेको अवस्थामा शनिबार बेलुकी करिब ६ बजेतिर तामाङको शव फेला परेको ईलाका प्रहरी कार्यालय सबैलाका प्रहरी निरीक्षक राजेश सिग्देलले जानकारी दिए । टिपरले टाउको किचेर नचिनिने अवस्थामा फेला परेको उनले बताए ।

मृतक परिवारले भने हत्या भएको भन्दै अनुसन्धान नहुन्जेल शव उठाउन नदिने अडान लिएको छ । ‘टिपर ४/५ फिट ब्याक गरेर पछाडिबाट किचेको छ । यो सुनियोजित हत्या हो,’ मृतकका दाइ हरि तामाङले भने ।

उक्त टिपरले सडक निर्माणका लागि गिट्टी बालुवा ढुवानी गरिरहेको बताइएको छ । घटनाबारे थप अनुसन्धान भइरहेको प्रहरीले जानकारी दिएको छ ।