विराटनगर, ५ जेठ । प्रदेश १ मा कोरोना संक्रमणबाट थप सात जनाको मृत्यु भएको छ । मंगलबार साँझ र बुधबार विहान गरि थप सात जनाको मृत्यु भएको हो ।

विराटनगरस्थित कोसी अस्पताल कोभिड–१९ उपचार केन्द्रमा दुई, नोबेल शिक्षण अस्पतालमा दुई, मोरङको बुढीगंगास्थित विराट शिक्षण अस्पतालमा एक र सुनसरीको धरानस्थित वीपी कोइराला स्वास्थ्य विज्ञान प्रतिष्ठानमा दुई जनाको मृत्यु भएको हो ।

कोसी अस्पताल कोभिड–१९ उपचार केन्द्रमा बुधबार विहान विराटनगर महानगरपालिका–८ का ४६ वर्षीय पुरुष र सुनसरीको रामधुनी नगरपालिका–५ का ४३ वर्षीय पुरुषको मृत्यु भएको सुचना अधिकारी अनुपम राजवंशीले जानकारी दिए ।

त्यस्तै विराटनगरस्थित नोवेल शिक्षण अस्पतालमा सुनसरीको भोक्राहानरसिंह गाउँपालिका–७ का ५४ वर्षीय पुरुष र झापाको दमक नगरपालिका–५ का ७३ वर्षीय पुरुषको मृत्यु भएको अस्पतालका प्रवन्धक नारायण दाहालले जानकारी दिए ।

बुढीगंगास्थित विराट शिक्षण अस्पतालमा विराटनगर–३ की ७० वर्षीया महिलाको बिहान मृत्यु भएको विराटका कोभिड इन्चार्ज सुनिल देवले जानकारी दिए ।

त्यस्तै सुनसरीको धरानस्थित वीपी कोइराला स्वास्थ्य विज्ञान प्रतिष्ठानमा मोरङको सुन्दरहरैँचा नगरपालिका–१० का ७२ वर्षीय पुरुष र बेलबारी नगरपालिका –९ की ५६ वर्षीया महिलाको मंगलबारसाँझ मृत्यु भएको प्रतिष्ठानका सह–प्रवक्ता डा. चुरामणी पोखरेलले जानकारी दिए ।