विराटनगर, ११ वैशाख । मोरङको सुन्दरहरैंचामा जारी प्रथम सुन्दरहरैँचा मेयरकप फुटबल प्रतियोगिताको आज सम्पन्न खेलमा लेटाङ नगरपालिकालाई पराजित गर्दै पथरिशनिश्चरे नगरपालिका फाईनलमा प्रवेश गरेको छ ।

मोरङको सुन्दरहरैचास्थित शुक्रबारे खेल मैदानमा सम्पन्न पहिलो सेमिफाईनल खेलमा लेटाङलाई १ का विरुद्ध २ गोलले पराजित गर्दै पथरिशनिश्चरे फाईनलमा प्रवेश गरेको हो । लेटाङका लागि मोदिकुमार राईले गोल गरेका थिए भने पथरीशनिश्चरेका विशाल पाण्डेले दुई गोल गरेका थिए ।

खेलको म्यान अफ दी म्याच पथरिशनिश्चरेका विशाल पाण्डे घोषित भए । उनले नगद २ हजार र मेडल हात पारे । भोलिको खेल आयोजक सुन्दरहरैँचा र उर्लाबारीबिच हुनेछ । प्रतियोगितामा विजेता टिमले नगद ३ लाख रुपैयाँ र उपविजेताले नगद १ लाख ५० शिल्ड मेडल तथा प्रमाण पत्र पाउनेछ ।