विराटनगर, ८ चैत । प्रदेश १ मा चालु आर्थिक वर्षमा लक्ष्यभन्दा बढी सशस्त्र प्रहरीको बोर्डर आउट पोष्ट(बीओपी) स्थापना भएको छ । प्रदेश १ मा चालु आर्थिक वर्षको सुरुवातसम्म २६ वटा बीओपीको संख्या थियो ।

त्यसलाई बृद्धि गरि ५० वटा पु¥याउने लक्ष्य राखिएकोमा २५ वटा थप गर्दै बीओपीको संख्या लक्ष्य भन्दा बढी अर्थात ५१ वटा पुगेको हो । आइतबार मोरङमा तीनवटा बीओपी स्थापना गरिएसँगै प्रदेश १ मा बीओपीको संख्या ५१ पुगेको सशस्त्र प्रहरी बल नेपाल नं. १ बराहा बाहिनीका बाहिनीपति सशस्त्र प्रहरी नायव महानिरिक्षक वंशीराज दाहालले जानकारी दिए ।

आइतबार भारतसँग सीमा जोडिएका दक्षिणपूर्वी मोरङका विभिन्न तीन स्थानमा सशस्त्र प्रहरी बलको बोर्डर आउट पोष्ट (बीओपी) स्थापना गरिएको छ ।

दक्षिणूर्वी मोरङको रंगेली नगरपालिका–५ स्थित धनापट्टी, सुनवर्षी नगरपालिका–८ स्थित सिक्टी र रतुवामाई नगरपालिका–२ स्थित मिर्चाडाँगीमा स्थापना गरिएका तीनवटै बीओपीको आइतबार संयुक्तरुपमा उद्घाटन गरिएको हो ।

आइतबार सुनवर्षी नगरपालिका–८ स्थित सिक्टीमा स्थापना गरिएको बीओपी प्राङ्गणमा आयोजित कार्यक्रममा तीनवटै बीओपीको सुनवर्षी नगरपालिकाका नगरप्रमुख कालीप्रसाद दास, उपप्रमुख मञ्जु राई, सशस्त्र प्रहरी बल नेपाल नं. १ बराहा बाहिनीका बाहिनीपति सशस्त्र प्रहरी नायव महानिरिक्षक वंशीराज दाहाल, मोरङका प्रमुख जिल्ला अधिकारी कोषहरी निरौला, सशस्त्र प्रहरी बल नेपाल नं. ३ हेडक्वाटर कंकालिनी मोरङका गणपति ससस्त्र प्रहरी उपरिक्षक तिर्थराज पौडेल, नेपाली सेना भैरव गण थलाहाका गणपति प्रमुख सेनानी गणेश रावल, जिल्ला प्रहरी कार्यालय मोरङका प्रमुख प्रहरी उपरिक्षक सन्तोष सख्काले संयुक्तरुपमा उद्घाटन गरे ।

तीनवटै बीओपी अस्थायी संरचना निर्माण गरि सञ्चालनमा ल्याइएको हो । रतुवामाईको मिर्चाडाँगी स्थापना गरिएको बीओपीको अस्थायी संरचना निर्माणका लागि निर्वाचन क्षेत्र पूर्वाधार विकास कार्यक्रम, रतुवामाई नगरपालिका र स्थानीय व्यवसायी तथा समाजसेवाहरुको करिब १५ लाख रुपैया सहयोग रहेको छ ।

त्यसैगरी सुनवर्षी नगरपालिका–८ स्थित सिक्टीमा स्थापना गरिएको बीओपीका लागि अस्थायी संरचना निर्माण गर्न निर्वाचन क्षेत्र पूर्वाधार विकास कार्यक्रमको १० लाख र सुनवर्षी नगरपालिकाको ५ लाख रुपैयाँको लगानी रहेको सशस्त्र प्रहरी बल बोर्डर आउटपोष्ट बरडंगा चुनीमारीका इन्चार्ज सुकबहादुर तामाङले जानकारी दिए।

उनका अनुसार रंगेली–५ स्थित धनापट्टिमा १० लाख रुपैयाँको लागतमा अस्थायी संरचना निर्माण गरि बीओपी सञ्चालनमा ल्याइएको हो । उक्त बीओपीहरु सञ्चालनमा आएसँग मोरङ जिल्लाको ६२.२ किलिमिटर क्षेत्रमा मात्र बिओपीको संख्या ११ पुृगेको छ ।

उद्घाटन कार्यक्रममा सशस्त्र प्रहरी बल नेपाल नं. १ बराहा बाहिनीका बाहिनीपति सशस्त्र प्रहरी नायव महानिरिक्षक वंशीराज दाहालले यसअघि तत्काल कायम रहेको पोष्टहरुको तुलनामा दोब्बररुपमा सीमा क्षेत्रमा सशस्त्र प्रहरीको उपस्थिती र परिचालनले सीमा सुरक्षाको प्रभावकारितामा बृद्धि भएको बताए ।

उनले बीओपी स्थापनाले सीमा क्षेत्रमा बसोबास गर्ने नागरिकले सुरक्षाको अनुभूती गर्न पाउने बताए । कार्यक्रममा सुनवर्षी नगरपालिकाका मेयर कालीप्रसाद दासले बीओपी स्थापनाले सीमाक्षेत्रबाट हुने अवैध गतिविधि नियन्त्रण हुने विश्वास व्यक्त गरे ।