नेकपाको स्थायी कमिटी बैठक नेता कमानसिंह लामाको निधनप्रति शोक प्रस्ताव पारित गर्दै सकिएको छ । आइतबारको स्थायी कमिटीको बैठकका लागि लामाको निधनको शोक प्रस्ताव मात्रै कार्यसूचीमा राखिएको थियो ।

स्थायी कमिटीको अर्को बैठक १ पुसमा बस्ने निर्णय भएको छ । ५ पुसमा भने केन्द्रीय कमिटीको बैठक बस्ने २१ मंसिरको स्थायी कमिटीले निर्णय गरिसकेको छ । आजको स्थायी कमिटी बैठकमा प्रधानमन्त्री केपी ओली पनि सहभागी थिए ।

पार्टीभित्रको अन्तरविरोधबारे छलफल गर्ने बैठकमा आफू सहभागी नहुने अडान राख्दै आएको ओली लामाको निधनको शोक प्रस्ताव मात्रै कार्यसूचीमा भएकाले सहभागी भएको एक नेताले जानकारी दिए ।

लामाको शोक प्रस्ताव मात्रै कार्यसूचीमा हुने भए बैठकमा सहभागी हुने ओलीको सन्देश स्थायी कमिटी सदस्य सुवास नेम्वाङले बिहान अध्यक्ष प्रचण्डलाई सुनाएका थिए । त्यसपछि नै धुम्बाराही पार्टी कार्यालयमा बस्ने भनिएको बैठक बालुवाटार सारिएको थियो ।