एजेन्सी, १९ मंसिर–रुसमा एक लाखभन्दा बढी नागरिकले रुसले नै विकास गरेको कोरोना भाइरस (कोभिड–१९) विरुद्धको खोप लगाएका छन् । रुसले गएको अगष्ट महिनामा नै कोभिड–१९ का विरुद्धको खोप स्पुतनिक–भी निर्माण गरिसकेको थियो ।

सो खोप प्रभावकारी रहेको भन्दै रुसले त्यसलाई प्रयोगमा ल्याएको हो । गत ११ अगष्टमा नै रुसले सो खोप प्रयोगमा ल्याएको बताइएको थियो । यसरी रुस कोभिड(१९ विरुद्धमा खोप लगाउने विश्वकै पहिलो देश भएको पनि बताइएको छ ।

रुसका स्वास्थ्यमन्त्री मिखाइल मुरास्कोले सो कुराको जानकारी दिएका छन् । साथै उनले रुसले यहाँका नागरिकलाई सो खोप लगाएकोे बारेमा भिडियो पनि बनाएको र त्यसको लिंक पनि संयुक्त राष्ट्रसंघलाई दिइएको बताएको छ ।

गएको महिना मात्र सो खोपको प्रभावकारीताको बारेमा अनुसन्धान गरिएको थियो । सो अनुसन्धानबाट उक्त खोपले करिब ९२ प्रतिशतसम्म काम गर्ने पाइएको थियो । रुसमा पछिल्लो समयमा कोभिड–१९ का संक्रमितहरुको संख्या बढ्दै गएको छ । यो समाचार तयार पार्दासम्म रुसमा २३ लाख ७५ हजार ५६४ जनाका कोरोना भाइरसको संक्रमण पुष्टि भएको छ । जसमध्ये संक्रमणका कारण ४१ हजार ६ सय ७ जनाको मृत्यु भएको छ । १८ लाख ५९ हजार ८ सय ५१ जना कोरोना मुक्त भएका छन् भने यतिबेला ४ लाख ७४ हजार ८८ जना सक्रिय संक्रमित रहेको वल्र्डोमिटरको तथ्यांकमा उल्लेख छ ।