बीपी कोइराला स्वास्थ्य विज्ञान प्रतिष्ठानमा आइतबार बिहान दुई र शनिबार राति एक संक्रमितको मृत्यु भएको हो । प्रतिष्ठानको कोभिड-१९ अस्पतालमा आइतबार विहान सुनसरीको दुहवी नगरपालिकाका ६५ वर्षीय पुरुषको ३.५० बजे मृत्यु भएको प्रतिष्ठानका प्रवक्ता डा. आशिष श्रेष्ठले जानकारी दिए ।

१४ असोजमा प्रष्ठिानमा भर्ना भएका मृतक पुरुषमा १५ असोजमा कोरोना पाेजिटिभ देखिएपछि कोभिड-१९ अस्पतालमा उपचार सुरु गरिएको थियो । हाइपरटेन्सनका बिरामीसमेत रहेका पुरुषको कोभिड अस्पतालमै उपचारका क्रमममा मृत्यु भएको हो ।

त्यस्तै, बीपीकै कोभिड अस्पतालमा उपचाररत धनकुटाकी ६१ वर्षीया महिलाको पनि मृत्यु भएको छ । १६ असोजमा धनकुटा अस्पतालबाट रेफर भई ल्याइएकी महिलाका आइतबार विहान ६.४० बजे मृत्यु भएको हो । २० गते कोरोना पोजिटिभ देखिएकी उनी मधुमेहकी दिर्घ रोगीसमेत रहेको प्रतिष्ठानका सहप्रवक्ता डा. श्रेष्ठले जानकारी दिए ।

त्यस्तै, धरान ८ की ६२ वर्षीया महिलाको शनिबार राति ८ बजे मृत्यु भएको हो । २१ असोजमा कोरोना पोजिटिभ देखिएकी महिलाको बीपी प्रतिष्ठानको कोभिड-१९ अस्पतालमै उपचारका क्रममा मृत्यु भएको हो । मृतक तीनै जनाको शव व्यवस्थापन नियम अनुसार भइरहेको प्रतिष्ठानले जनाएको छ ।

यता विराटनगरस्थित नोबेल शिक्षण अस्पतालमा शनिबार राति दुई जना कोरोना संक्रमितको मृत्यु भएको छ । सुनसरीको दुहवी-३ की ४० वर्षीया महिलाको राति ११ बजे मृत्यु भएको अस्पतालका प्रबन्धक नारायण दाहालले जानकारी दिए ।

महिलालाई असोज २० गते अस्पताल भर्ना गरिएको थियो । उनमा २१ गते कोरोना पोजिटिभ देखिएको थियो । मृतक महिलामा मधुमेह र फोक्सोसम्बन्धी पुरानै समस्या रहेको अस्पतालले जनाएको छ । त्यस्तै, नोबेलमै उपचाररत सुनसरीको हरिनगरा-४ का ७१ वर्षीय वृद्ध पुरुषको पनि राति १०ः१५ बजे मृत्यु भएको छ ।

श्वासप्रश्वासमा समस्या भएका उनलाई उपचारका लागि असोज २१ गते अस्पताल भर्ना गरिएकोमा सोही दिन गरिएको पीसीआर परीक्षणमा रिपोर्ट पोजेटिभ आएको थियो । मृतकमा फोक्सो सम्बन्धी पुरानै समस्या रहेको नोबेलका प्रवन्धक दाहालले जानकारी दिए ।