विराटनगर, २० असोज–प्रदेश १ पछिल्लो २४ घण्टामा ३३० जना कोरोना संक्रमित थपिएका छन् । दैनिक संक्रमण संख्यामा यो अहिले सम्मकै उच्च हो । मोरङमा दुई सय १०, सुनसरीमा ९१, झापामा १७, संखुवासभामा तीन, उदयपुरमा दुई, धनकुटा र खोटाङमा एक÷एक र प्रदेश १ बाहिरका जिल्लाका पाँच जना रहेको सामाजिक विकास मन्त्रालयले जनाएको छ ।

मन्त्रालयका अनुसार विराटनगरमा मात्र एक सय ५० जनामा संक्रमण देखिएको छ । संक्रमण पुष्टि भएकामा ६९ महिला र ८१ पुरुष छन् । मोरङको सुन्दरहरैचामा १३ महिला आठ पुरुष, कटहरीमा सात महिला १२ पुरुष, बुढीगंगामा एक महिला चार पुरुष, रंगेलीमा एक महिला दुई पुरुष, धनपालथानमा एक महिला दुई पुरुष, रतुवामाईमा तीन पुरुष, जहदा, कानेपोखरी र पथरीशनिश्चरेमा एक÷एक र स्थानीय तह नखुलेका तीन पुरुषको रिपोर्ट पोजेटिभ आएको मन्त्रालयले जनाएको छ ।

त्यसैगरी सुनसरीको धरानमा २८ महिला २६ पुरुष, इटहरीमा छ महिला १२ पुरुष, इनरुवामा एक महिला चार पुरुष, रामधुनीमा दुई महिला दुई पुरुष, बर्जुमा एक महिला तीन पुरुष, दुहवी, भोक्राहा नरसिंह र बराहक्षेत्रमा एक÷एक पुरुष, स्थानीय तह नखुलेकमा एक महिला दुई पुरुष, झापाको भद्रपुरमा एक महिला पाँच पुरुष, विर्तामोड र दमकमा तीन÷तीन पुरुष, हल्दिबारीमा दुई पुरुष, बाह्रदशी, अर्जुनधारा र बुद्धशान्तिमा एक÷एक पुरुषको रिपोर्ट पोजेटिभ आएको छ ।

त्यसैगरि संखुवासभाको खाँदबारीमा दुई र चैनपुरमा एक पुरुष, उदयपुरको त्रियुगामा दुई पुरुष, धनकुटा र खोटाङको दिक्तेलमा एक÷एक पुरुष र प्रदेश १ बाहिरका दुई महिला ३ पुरुषमा स.क्रमण देखिएको सामाजिक विकास मन्त्रालयले जनाएको छ । योसँगै प्रदेश १ मा कोरोना संक्रमितको संख्या आठ हजार एक सय पाँच पुगेको छ ।

प्रदेश १ मा मंगलबार ३२ जना डिस्चार्ज भएका छन् । जिल्ला अस्पताल संखुवासभाबाट ३०, वीपी कोइराला स्वास्थ्य विज्ञान प्रतिष्ठान र विराट मेडिकल कलेजबाट एक÷एक जना डिस्चार्ज भएको मन्त्रालयले जनाएको छ । मंगलबार डिस्चार्ज भएकासँगै प्रदेश १ मा डिस्चार्ज हुनेको संख्या चार हजार एक सय २२ पुगेको छ ।

प्रदेश १ मा मंगलबार छ सय ६६ जनाको पीसीआर परीक्षण भएको छ । परीक्षण गरिएका मध्ये १३५ पुरुष र १९५ महिलको रिपोर्ट पोजेटिभ आएको हो । मन्त्रालयका अनुसार हालसम्म प्रदेश १ मा एक लाख २७ हजार पाँच सय ५६ जनाको पीसीआर परीक्षण गरिएको छ ।