विराटनगर, ५ असोज–२४ घण्टामा प्रदेश १ मा कोरोना संक्रमणबाट ३ जनाको मृत्यु भएको छ । ताप्लेजुङ, सुनसरी र झापाका एक÷एक महिलाको मृत्यु भएको हो । योसँगै प्रदेश १ मा मृत्यु हुनेको संख्या ५६ पुगेको छ । प्रदेश १ मा सोमबार एक सय १९ जना कोरोना संक्रमित थपिएका छन् । मोरङमा एक सय ५, सुनसरीमा नौ, झापामा दुई, उदयपुर, संखुवासभा र प्रदेश १ बाहिका ११ एक÷एक जना संक्रमित थपिएको सामाजिक विकास मन्त्रालयले जनाएको छ ।

मन्त्रालयका अनुसार विराटनगरमा ४३ महिला र ५४ पुरुष थपिएका छन् । मोरङको कटहरीमा दुई महिला चार पुरुष, ग्रामथानमा एक महिला र बुढीगंगामा एक पुरुषको रिपोर्ट पोजेटिभ आएको सामाजिक विकास मन्त्रालयले जनाएको छ । सुनसरीको धरानमा पाँच महिला चार पुरुष, झापाको विर्तामोडमा एक पुरुष, मेचीनगरमा १ महिला, उदयपुरको त्रियुगा र संखुवासभाको चैनपुरमा एक÷एक पुरुष र प्रदेश १ बाहिरकी एक महिलामा संक्रमण देखिएको मन्त्रालयले जनाएको छ । सोमबार पुष्टि भएकासँगै प्रदेश १ मा कोरोना संक्रमितको संख्या पाँच हजार छ सय ९३ पुगेको छ ।

प्रदेश १ मा सोमबार १६ जना संक्रमण मुक्त भएका छन् । कोशी अस्पताल कोभिड १९ उपचार केन्द्र, विराटनगरबाट १०, कालिसदन आईसोलेसन, विराटनगर र झुर्किया प्राथमिक स्वास्थ्य केन्द्र, रतुवामाईबाट तीन÷तीन जना डिस्चार्ज भएका हुन् । योसँगै प्रदेश १ बाट दुई हजार पाँच सय ५२ जना डिस्चार्ज भएका छन् । प्रदेश १ मा हाल सम्म एक लाख १६ हजार पाँच सय ५२ जनाको पीसीआर परीक्षण गरिएको मन्त्रालयले जनाएको छ ।