सरकारी तथा निजी अस्पताल वा प्रयोगशाला सबैले घटेको शुल्कमा पीसीआर परीक्षण गराउनुपर्ने छ । राष्ट्रिय तथा अन्तर्राष्ट्रिय बजारमा पीसीआर परीक्षणको शुल्क पुनरावलोकन गरिएकाले नेपालमा पनि शुल्क घटेको उनकाे भनाइ छ ।

बजारमा रिएजेन्ट र पीसीआरका अन्य सामानको मूल्य घटेको आधारमा परीक्षण शुल्क पनि घटाइएको उनले जानकारी दिए । यसअघि मन्त्रालयले पीसीआर परीक्षणका लागि चार हजार ४ सय रूपैयाँ तोकेको थियो । त्यसअघि पीसीआर परीक्षणका लागि मन्त्रालयले पाँच हजार ५ सय रूपैयाँ शुल्क तोकेको थियो ।

नेपालमा अहिलेसम्म आठ लाख ४० हजार ५ सय २७ जनाको पीसीआर परीक्षण गरिएको छ । त्यसमध्ये ५४ हजार १ सय ५९ जना संक्रमित भएका छन् । दैनिक करिब १० हजारको सङ्ख्यामा पीसीआर परीक्षण भइरहेको छ ।

सरकारले सर्वसाधारण सबैलाई निःशुल्क परीक्षण गर्दै आइरहेको छ भने सशुल्क परीक्षण गराउन इच्छुक व्यक्तिले मन्त्रालयले तोकेको अस्पताल वा प्रयोगशालामा गई परीक्षण गराउन सक्ने व्यवस्था गरेको छ ।

अहिले ४७ सरकारी प्रयोगशालामा पीसीआर परीक्षण हुँदै आएकाे छ । यसैगरी मन्त्रालयले बंगलादेशबाट आएको रेम्डेसिभिर खोप नेपाल स्वास्थ्य अनुसन्धान परिषद्को निर्देशिकाअनुसार प्रयोग गर्न सूचिकृत भएका अस्पतालमा बिरामीको चाप हेरेर वितरण गर्न निर्देशन दिएको प्रवक्ता गाैतमले जानकारी दिए । उक्त खोपको सम्पूर्ण वितरण परिषद्ले प्राप्त गरी मन्त्रालयमा पेस गर्नसमेत भनिएको छ । सरकारले बंगलादेशबाट पाँच हजार खोप प्राप्त गरेको उनले जानकारी दिए ।