एजेन्सी, साउन २९-भारतमा गत २४ घण्टामा झण्डै ६७ हजार कोरोना संक्रमित थपिएका छन् । भारतीय सरकारी अधिकारीले बिहीबार दिएको जानकारीअनुसार पछिल्लो २४ घण्टामा ६६ हजार ९ सय ९९ जना नयाँ सङ्क्रमित भेटिएका हुन् ।

केन्द्रीय स्वास्थ्य तथा परिवार कल्याण मन्त्रालयले सोही अवधिमा कम्तीमा ९ सय ४२ जनाको कोरोनाकै कारण मृत्यु भएको पनि जनाएको छ । योसँगै भारतका कोरोनाका कारण मृत्यु भएकाहरूको कुल संख्या ४७ हजार ३३ पुगेको छ ।

त्यसैगरी भारतमा अहिलेसम्म कुल सङ्क्रमितको संख्या २३ लाख ९६ हजार ६३८ पुगेको अधिकारीहरूले जनाएका छन् । तीमध्ये ६ लाख ५३ हजार ६२२ जना अझै पनि सङ्क्रमित अवस्थामै रहेका छन् भने १६ लाख ९५ हजार ९८२ जना सङ्क्रमणमुक्त भएका छन् ।

अधिकारीहरूका अनुसार सबैभन्दा धेरै महाराष्ट्रमा १ लाख ४७ हजार ८ सय २० जना र दोस्रो धेरै आन्ध्र प्रदेशमा ९० हजार ४ सय २५ जना अझै पनि सङ्क्रमित अवस्थामै रहेका छन् ।

यसैबीच, कोरोनाका कारण विश्वभरी सङ्क्रमित भएकाको संख्या २ करोडभन्दा बढी पुगेको छ । पछिल्लो विवरण अनुसार विश्वभरी २ करोड १ लाख ६२ हजार ४ सय ७४ जना सङ्क्रमित भएका हुन् ।

कुल सङ्क्रमितमध्ये २ लाख १४ हजार ९८५ जना पछिल्लो २४ घण्टामा सङ्क्रमित भएका जनाइएको छ । त्यसैगरी ४ हजार ८३५ जनाको सोही अवधिमा मृत्यु भएको छ ।

योसँगै विश्वभरी कोरोनाका कारण मृत्यु भएकाहरूको संख्या ७ लाख ३७ हजार ४१७ पुगेको विश्व स्वास्थ्य संगठन (डब्लुएचओ) ले जनाएको छ । डब्लुएचओले गत ११ मार्चदेखि विश्वभरी कोरोनाको महामारी फैलिएको घोषणा गरेको थियो ।